Gran Sabana

So isch au scho wider Dezember, die Ziit raennt, aber trotzdem hani irgendwie s Gfuehl ich seg scho ewig da.
Ich bin etz daenn scho bald e Wuche zrugg vom Gran Sabana Trip, am Maentig gahts scho wider los uf de nexti, wo ois is Orinoco Delta, in Jungle fuehrt.
Dett simmer daenn groesstteils mit Kajaks underwaegs, mir haend scho 2 Usflueg vo da us gmacht, zum d Kajaks z teste und so, ich han's raecht laessig gfunde, aber dett haemmer nur fuer ca. 30 Minute muese paddle (sind Einzelkajaks) und ufem Trip muemer bis zu 8 Stund oder meh taeglich und ich weiss echt nonig wie ich das soell mache mit mine Puddingaerm, han doch null Muskle und han nach dene 30 Minute scho halbe Chraempf gha. Mir haend au g'uebt wie mer sich retted, waenn s Kajak umkippt und das isch au e raechti Uebig gsi, isch mer nacher de ganz Tag no Wasser us de Nase usegloffe, aber ich han's ueberlaebt.
Mir waerded oisi Sache daenn au so in Tanks, das sind so Loecher im Kajak underbringe, das heisst ich mues miis Gepaeck ufs Minimum reduziere, aber mir raenned warschinli e die meist Ziit i Badhose ume.
Huet haemmer no Expedition Hammocks uebercho, also spezielli Haengematte, wo bsundrigs liecht sind und schnaell troechned und mer chan's au sehr chli zaemepacke. Die bruucheds au i de brasilianische Armee.
Dezue natuerli Moskitonetz, ich glaub de Trip wird am extremste mit Moskitos, halleluja.

Also etz aber zum Gran Sabana Trip, also Gran Sabana isch e Hoechflaechi im Suedoste vo Venezuela, mit risige Tafelberge, i de Sprach vo de iheimische Pemon Indianer heissed die "Tepuis". Mir haend eine vo dene Berge bestiige, de Mount Roraima, 2810 meter.

Z erst haemmer e Fahrt vo 2ehalb Taeg vor ois gha und haend underwaegs uf Campings uebernachted. Die zweit Nacht haemmer ime Camp i de Noechi vo El Dorado uebernachted, beme Schwyzer wo vor 30 Jahr nach Venezuela usgwanderet isch. Er haett raecht vill Gschichli uf Lager gha, haett under anderem au im Vietnam Chrieg kaempft. Mir haend det eifach oisi Zaelt ufgschlage und saelber z Nacht und z Morge gmacht. Naebed em Camp haets e 7.5 Meter Brugg gha und dett simmer abe in Rio El Dorado gumped, die einte sind so ungluecklich glandet, das nacher riisigi blaui Flaecke a de Bei und Fuedli gha haend und chum meh haend choene hocke und de eint haett en Raenzler gmacht und nacher Bluet gspuckt. Ja nacher ischs wiiter gange, d Nacht druff haemmer ime Pemon Indianer Camp uebernachted. Naebed em Camp haets en Wasserfall gha womer haend choene bade. Am nexte Morge haemmer mit de Iheimische Indios Fuessball und Volleyball gspillt und die haends erstuunlich guet im Griff gha und voll nach Regle gspillt.
D Chind vo de Schuel dett haend es Lied fuer ois gsunge und sind daen au no go Fuessball spile cho und es seg raecht schwer gsi, de Boele z halte, waenn eim oeppe 30 Chnoepf vor de Fuess dure raened (ich bin nur go Volley spile, Fraueteam gaeg Fraueteam und d Indiofraue haend ois voll gschlage) Und ich glaub au d Mane haend oisi Jungs gschlage im Volley, obwohl die all oeppe en Chopf chliner gsi sind.

Ja daenn di nexte 2 Naecht haemmer in San Francisco uebernachted, au in Zaelt, wie de ganz Trip. Mir haend oises 3er Zaelt z 4te teilt und 2 i mim Zaelt sind 1.80 Fraue und darum ischs raecht aeng gsi zum schlafe. Ufem Berg simmer daenn aber all froh gsi, wills so chalt gsi isch.
Also ebe, am erste Tag in San Francisco haemmer e chlini Wanderig planed gha, so fuer 3 Stund, mir sind mit eme iheimische Fuehrer gange und oisi Guides sind nach Santa Elena go ichaufe. Die 3 Stund Wanderig isch aber am Schluss fast 10 Stund gange und mir sind de Rest im Dunkle gloffe, bis mir daenn aentli vome Jeep abgholt worde sind. Eine vo oisne Jungs i de Gruppe isch zrugg im Camp blibe, will er e risigi Blattere am Fuess gha haett und wo mir daenn nach idunkle nonig zrugg gsi sind, isch er miteme Iheimische Fuehrer ois go sueche cho.
Am nexte Tag haemmer daenn chli choene relaxe und packe und am Tag druff ischs daenn los gange. D Bestigig vom Mount Roraima. Gstarted haend mir in Paratepuy und sind vo dett us innerhalb vo 3 Taeg ue und haend underwaegs 2 mal uebernachted, die erst Nacht ime Camp ame Fluss, also waenn ich Camp saege, sind das meistens nur so Huettene wo mer chan Zueg understele und rundume chamer daenn Zaelt ufstele und waemmer Glueck haett, haets no Tisch und Baenk zum aesse.
Und die 2t Nacht haemmer im Basecamp am Fuess vom Mount Roraima uebernachted und de
3ti Tag isch alles steil duruf gange. Mir haend all oises Gepaeck und Food, womer underwaegs bruucht haend saelber muese traege, das isch raecht heavy gsi, aber ich han mich choene uf mini Bei verlah und sie haend mich uetreit und ich han im Gaegesatz zu anderne noed gross Blattere oder Druckstele gha. Die einte haend risigi Blattere a de Fuess gha und Schmerzmittel gnoh, damits choend laufe. Au vo de Usduur her hani guet moege, aber bin au immer sehr erschoepft gsi am Abig und han Muskelkater gha. Pro Tag simmer nie so lang underwaegs gsi, so 4 Stunde, aber alles immer duruf und mit vill Gepaeck und waemmer amel acho sind i de Camps, haetts gad guet glanget zum Food vorbereite, im Fluss bade und Zaelt ufstele und scho isch es wider dunkel worde.
Mir haend i de Fluess kei Seife und Shampoo doerfe bruche, das heisst mir haend ois 6 Taeg nur mit Flusswasser gwaesche und mir haend au nur Flusswasser trunke, aber das isch so suuber dett und vill besser als s Wasser im Camp in Chichi.
Ussert oisere Gruppe und 3 vo oisne Guides sind no paar iheimische Guides mitcho wo Zueg treit haend, wie Gaschocher und so und 2 vo oisne Maedels haend Guides zahlt, damits ine de Rucksack uf de Berg traeged. Die eint haett Chnueproblem und die ander isch scho uf de 10 Stunde Wanderig zaemegheit und haett sich noed zue traut, so en schwere Rucksack uf de Berg z schleppe.
Ja im Grosse und Ganze ischs es super Erlaebnis gsi und mir haend die best Ussicht gha vom Berg, mir haend dett obe (ca. 70 Quadratmeter Plateau) 2 Naecht inere Hoehli verbracht, womer gschuetzt gsi sind vom Wind. Es isch echt chalt gsi und windig und mer haett sich immer guet muese ipacke. Mir sind umgaeh gsi vonere bizarre Felselandschaft, mer gseht das au ufem buhi sine Foeteli, ganz lustigi Felsformatione haets gha, die einte haend Naeme und mer chan sich guet vorstele warum. A dem einte Tag wo mir zuesaetzlich ufem Gipfel verbracht haend, isch nomal e Wanderig agstande, optional 10 Stunde oder 3 Stunde. Die 10 stuendig haett eim zum 3 Laender Eck bracht womer in Venezuela, Brasilie und Guyana staht und die chuerzer zum "Window" womer Ussicht uf de Mount Kukenan hett soele ha, aber es isch so naeblig gsi, das mer gar nuet gseh haett. Defuer haend mir underwaegs ime chline "Pool" en Art Wasserloch i Kristallwasser badet. Dett obe wimmlets vo Kristall, aber es isch straeng verbote zum welchi mitneh. Ebe, ich han mich fuer di chuerzer Wanderig entschiede, will ich noed ganz z waeg gsi bin (verchelted und so) und mir doch au no 2 Taeg Abewaeg vor ois gha haend.
Ja ufjedefall isch au de Abewaeg guet gange und mir haend no ei Nacht benere Indiofamilie uebernachted, wo mir haend choene Pepsi und Bier chaufe, en wahre Luxus dett obe.
Ja und wo mir daenn wider dune gsi sind, simmer nach Santa Elena und dett haemmer 2 Naecht inere Posada (en Art Motel) uebernachted, i richtige Bett! Und mir sind am Abig go Pizza aesse, all frisch duschet und nachem Pizza aesse no inen Nacht Club.
Ich bi mit 3 Schwedinne und de Schwiizerin im Zimmer gsi und mir haend i oisem Zimmer als einzigi Fernseh gha, das heisst mir haend ois all die amerikanische Comedy Saendige aglueget und au das isch ganz komisch gsi.
Ja daenn haemmer no en Usflug nach Brasilie gmacht, eifach ein Tag chli go poste, gad unmittelbar nach de Graenze.

Ah und apropos Gran Sabana, also Jurassic Park, die Szene vo de Helikopter ueber d Insle fluegt unds Dinosaurier gsehnd raene, das isch i d Gran Sabana, sie haends eifach so gschnitte, das es wie e Insle usgseht, mir haend au de Ort gseh, aber ich mag mich nuem gross a de Film erinnere und Dinos hani au kei gseh *g*
Aber ufem Mount Roraima laebt en Frosch wo no us saebere Ziit stammt. Er isch ganz winzig und paechschwarz.

Ja ufjedefall zrugg nach Chichiriviche simmer daenn ueber Valencia miteme spezielle Nachtbus zum Ziit spare und die Wuche simmer wider im Camp und haend no di letschte Spanischlektione. Eigetli waer de nexti Trip am Suntig los gange, also morn, aber daenn sind d Wahle und d Luet sind scho die ganz Wuche voll am abdreihe und Fuerwerk abfuere wie di Hohle, Umzueg mache und so, de Chavez verteilt Gaeld a sini Ahaenger und morn wirds daenn total crazy sii, au straengeri Kontrolle uf de Strasse und mir sind sowiso scho di ganz Ziit usegnoh worde, darum waend mir ois das erspare und goend erst am Maentig.

Apropos Kontrolle, also d Guardia Nacional da isch echt uh muehsam, die naemed ois wie gseit jedesmal und ueberall use und daenn glotzeds i d Autos ine und waend all oisi Paess gseh, es sind vor allem jungi Burschte, teilwiis juenger als ich und die haend natuerli mega Froid a so villne Bleichgsichter.
Letscht mal haett mich eine gad wele dett bhalte, zum Glueck haends mi aber noed zrugg lah.
Waemmer Paech haett, naemeds au no de ganzi Ahaenger und d Rucksaeck usenand, aber bis etz isch oisere Gruppe no nuet i dere Art passiert. Eifach immer warte im Auto, bis oisi Guides alles greglet haend und all Staempfel zaemehaend wos bruuched.

Ja daenn zum Camp Ueberfall hani au no News, also mir wuessed etz, wers gsi isch, de wo's au verdaechtiget haend, en Crack Suechtige us de Ortschaft, zaeme mit 2 Komplize. Die bede haends gschnappet, aber de ander isch mit de ganze Bueti ab und devo. D Polizei Undersuechig gaht aber sehr harzig vorwaerts, die waend immer Gaeld fuer alles und momentan brucheds anschiinend Gaeld fuer noi Toeff Teili und etz tuends schwirig.


Hm ja, was suscht no, also huet mueni mich definitiv entscheide, was ich im 3te Monet wott schaffe und ich glaub ich gahn etz doch noed uf d Farm us verschidene Gruend und die ander Option waer etz en Monet ines Jungle Camp wo ich Touriste betroie muesti. Das heisst aber au Wiehnachte und Neujahr im Jungle, was mir aber gad raecht isch, dett waerdeds sicher kei Fuerwerk ha.
Halt oi ufjedefall ufem laufende.

Liebi Gruess....

PS: Versueche huet Abig no Foeteli upzloade, chan aber no nuet verspraeche.