¿Como esta la veina?

Was aehnlichi Beduetig haett wie "what's up" und daenn muen mer antworte "todo chevere".
Isch so iheimische Slang da.
Ja mir sind gad zrugg vome Trip nach Cayo Sal, das isch e chlini Insle (ca. 9km Umfang) gad vor de Kueste vo Chichiriviche. Mir sind mit de Motorboetli uebere, haend ois dett en guete Platz under de Palme usgsuecht, de ganz umeliegend Abfall besiitiget und daenn oisi Zaelt ufgschlage und e Fuerstell gmacht.
Nacher simmer usgibig go bade und schnorchle und am Abig haemmer Suppe Iitopf gmacht und Junglebrot, was fast chli we Omelette gschmoeckt haett.
Am Abig simmer daenn all ums Fuer umeghocket und de Morten haett lustigi Wandersage verzellt. Dett hani daenn z erst mal d "Pudi-Pudi Sandflies" z gspuere uebercho. Oise Guide, de Rene, haett ois scho gwarnt devor, aber ich hett noed daenkt, das die so brutal bissed. Ich han nach churzer Ziit oeppe 10 Biss gha, es haett so krass bisse, das ich mir am liebste d Huut abzoge hett. D Natalia, Guide/Spanishlehrerin haett mir daen verzellt was passiert, waenn ich wiiter so chratze: die juckende Stelle schwelled uf, entzuendet sich und es chan sii, das de Koerper s Bluet nuem cha stoppe. Usserdem choends riisig waerde und gruen inedra und fuer mehreri Monet nuem waeggah. Ich han z erst gmeint sie verarschi mich, aber sie haetts so bestimmt gseit und mich so ernsthaft aglueget, das ichs fast han muese glaube.
Darum hani daenn halt d Zaeh zaemebisse, aber fuer de next Trip tueni mir was zaememixe us B12 und Baby Oel, das hilft anschiinend. All die wo das anetah haend, haend kei Problem gha.
Ich han etz de ganz Rugge verstoche, wie gseit oeppe 10 Pudi Pudi Biss und daenn nomal oeppe 10 Muggestich. Es isch echt paradiesisch gsi uf dere Insle und allgemein da, aber alles haett natuerli au e Chersiite.
Ufjedefall sind mir daenn ziemlich frueh go pene, will de Rene ois am 5i am Morge wider gweckt haett, zum de Suneufgang go luege.
D Nacht isch raecht lang gsi, es isch so heiss gsi im Zaelt, das mir all fast verstickt sind, mir sind z Vierte i eim Zaelt gsi.
Dusse schlafe hani noed wele waeg de Pudi Pudis und usserdem haets nach Sturm usgseh und mer haett Gwitter ghoert vo wiitem, aber irgendwie haemmer Glueck gha und sind schlussaendlich doch verschont bliibe. Bin eifach z Nacht wo ich fuer chlini Meitli han wele, fast vonere Kokosnuss erschlage worde, wos vo de Palme abegwindet haett, das isch en wiitere Grund gsi, warum ich zrugg is Zaelt pressiert han.
Also isch allem i allem raecht e schlaflosi Nacht gsi fuer all vo ois, obwohl mir ois druff gfroit haend, mal wider flach z lige.

Am nexte Tag simmer daenn ebe de Suneufgang go luege, haend zwar noed allzu vill gseh, wills raecht bewoelkt gsi isch.
Nacher haetts heissi Schoggi geh und z Morge, also Flakes und Banane.
Und daenn ischs los gange mit Spanischunterricht. Mir sind uf de Insle umegloffe und haend s Zueg benaennt haend also quasi Aktivunterricht gmacht, wie au im Camp, mir schaffed ohni Buecher, aber ich han's Gfuehl mir choemed so besser vorwaerts.
Gaeg Aendi vom Unterricht haemmer daenn no es Schlammbad gnoh, das Zueg haett zwar nach fuule Eier gschmoeckt aber am Schluss sind doch fast all sich am drin waelze gsi und d Natalia, wo das ganze agstifted haett, seit sogar es segi guet fuer Huut und Haar. Nacher simmer all wie Zombies wider zu oisne Zaelt zrugg und haend oisi bede Guides Rene und Jose packt und igschmiert.
Nacher haemmer eifach suscht no chli badet und Beach Volley gspillt usserdem haets no Melone geh und mir haend Kokosnuess ufgschlage und g aesse und am Mittag haett ois s Boot wider abgholt. Etz haemmer wider Freiziit und morn gahts daenn wiiter mit Spanisch Unterricht be de Pamela. Ich bliib etz doch i dere Gruppe, mir lerned doch no so einiges be ihre, die erst Stund isch eifach muehsam gsi, aber etz ischs faengs spannender und abwaechsligsriicher. Mir lerned vill Wortschatz und Saetzli mache. Es isch amel eifach bitz muehsam will die Frau so unglaublich vill Energie haett fuer ihri 61 Jahr und ois laht umeraenne di ganz Ziit und 70mal ufstah und wider absitze, darum mached mir au gad no Sport be ihre. Es isch eifach mega astraengend, wills so tammi heiss isch immer und mir suscht scho die meist Ziit schweissgebadet im Zueg umehocket bis mir daenn aentli an Strand choend.

Ja etz simmer nomal im Camp bis am Sunntig und am Maentig gahts daenn los nach Gran Sabana. Bis daenn gnuessemer s abhaenge im Camp no chli, es isch echt laessig dett und d Luet sind all so cool druff, mittlerwiile simmer wuerkli zunere Truppe zaemegwachse und all sind chli mit allne. Klar redi etz no vill English, aber das mit em Spanisch rede wirdi daenn waehrend mine Voluntary Work Ziite praktiziere.
Etz froi mi daenn uf e ruhigi Nacht und hoffe de Brutus jagt noed wider Chraebs (die haets da ueberall) daenn macht er naemli ganz unheimlichi huelendi Gruuesch.

En Sunebrand hani mir mittlerwile au gholt, aber zum Glueck haend mir Aloe Vera Pflanze, dett choemmer eifach bitz abschniide und s Pflanzeinnere uf d Huut tueh und das chuelt schoen. Mir haend au vill Kokospalme und waenn mir waend, choend mir e Kokosnuss abe hole und abenand schlah und d Kokosmilch drus trinke.

Ahja, falls ich oepperem mal soell aluete, nur saege, ich chan da natuerli au telefoniere, muen mir eifach saege waenn ihr dihei sind und ich luege das ich daenn i d Stadt chan.

PS: Foeteli zum Cayo Sal Trip uf buhi.eu, Photos und daenn "Morocoy"