Tranquillo

Huet Abig isch be ois im Camp wider Party agseit, mir muend ois all irgendwie verchleide, mit Zueg us de Natur, Kokosblaetter, Blueme etc. Bin ja eigetli noed so Fan vo verchleide und waehrend etz all andere im Camp hocket und ifrig a irne Kostuem umebastled, goend d Rebekka und ich daenn nacher mal an Strand und haenked ois chli Holz oder sustigs Strandguet um. De Morten und ich haend gfunde, falls mer bis am Schluss gar nuet haend, waelzemer ois eifach im Draeck und goend als Dirtbags.
Mal luege. Party saelber wird sicher lustig.
Vorher bini no i de Bank gsi, das isch au ziemli langwiirigi Sach, bis mal diis Gaeld haesch. Allgemein waenn da inen Lade gasch, muesch fast en Tanz verastalte, das dich mal beachted (entgaege de Luet uf de Strass, wo immer lueged, waenn en Gringo oder e Gringa durelauft, vor allem d Type, daenn macheds bs bs und waenn luegsch, was eigetli noed soettsch, macheds Kusslippe) und es chan scho vorcho, das amel bis zu 3 Persone glichzitig bedient werded. Oder ebe falls bedient wirsch, fangets ploetzli mit oepper anderem a rede und alles isch immer tranquillo da, sehr gmuetlich nur ja kein Stress. D Venezolaner goend au erst daenn go schaffe waenns Lust haend, sie haend kei fixi Ziite. Gwuessi Gschaefter haend amel offe, daenn wider noed, amel goends am 2 am Namittag uf, amel erst am 4i.
Und meistens hockeds eifach chli am Strasserand, schwaetzed, lueged, oder fahred mit de allerschlimmste Schrotthuuefe vo Autos dur d Strasse, sogar d Taxi, die gheied fast usenand.
Daenn haets ueberall so chlini Tischli mit 1 oder meh Venezolaner uf Klappstuehl und uf de Tischli haets Natel. Falls mer telefoniere mues, chan mer eis vo dene Natel benutze und nacher d Person ufem Klappstuehl zahle.
Mittlerwiile hani au bemerkt, das doch noed all Venezolaner so fruendlich sind und zwar seg das, will sie meined, das mir Gringos meined (und so naeneds ois wuerkli, das ghoeri amel) mir seged was bessers als sie. Darum muend mir ois immer meh Mueh geh zum fruendlich sii, aber maengisch nuetzt noed mal das. Mer choent wuerkli meine, waenn d Venezolaner mal schaffed, daenn haends total de Aschiss. Da ischs be de UPS also duetlich heiterer zue und her gange. Aber anyway...

Gester haemmer en Usflug uf Valencia gmacht, mir waehred eigetli ines grosses Shoppingcenter, aber womer dett acho sind (nach ca. 3 Stund Fahrt), haetts gheisse, im ganze Shopping Center seg de Strom usgfahle, es seg fuer de ganzi Tag zue. Am vorder Igang haesch daenn au gseh d Luet usestroeme, voellig verwirrt.
Mir haend daenn zum Glueck ines anders Shoppingcenter choene, ganz i de Noechi und das isch ganz im American Style gsi, riisig gross und mit Mac Donalds und Wendy's und jenes Laede, Surferstore, Zara, Bastellade, Outdoor Store... und alles total abekuehlt, wie ime Chuelschrank.
Im Tierlade bini daenn mega haessig worde, will sie Hundebabys i chline Chefig ine ghalte haend zum verchaufe, ich han am Verchaufer miin toedlichste Blick zuegworfe, will mit em spanisch Flueche bini nonig so Sattelfest. Ah, etz bini gad wider uf 180 waeni dra daenke.

Tja ufjedefall haend mir daenn dett chli choene poste und sind daenn vo de Guides wider abgholt worde. Die haend no Soundalag iboue lah i die 3 Jeeps und haend daenn no oeppe 2 Stund ueber de Priis muese verhandle.

Jaja was suscht no, also ich han ja etz Bekannschaft gmacht mit de Pudi Pudi Flies. Ich han mit em Glenn, am Camp Leiter druebe gredt und er haett verzellt, das er ufere Tour mal s ganze Gsicht voll mit Baby Pudi Pudis gha heg und d Natalia haett verzellt, uf einere Tour seg mal ihre ganz Rugge ei grossi roti juckendi Flaechi gsi und sie heg z Nacht fast gschroue, wills so fest bisse heg und sie noed heg doerfe chratze. Gottchen, was chunnt da no uf mich zue......
Das isch noed im Programm gstande, wo ichs buechet han *g*
Also Luet, ich glaub ihr muend oi weniger Sorge mache, das ich ueberfalle wird oder Malaria ueberchume oder so.. Nei, falls ich nueme soett i d Schwiiz zruggchere, haend mich d Moskitos ufgfraesse oder d Pudi Pudis i Stuck grisse oder vilicht au ich mich saelber will mini Huut so biist.
Ah ja letschti haends mi sogar in Chopf gstoche und d Pudi Pudis haend mich bede Auge zue gnoh, daenn han mer uf Cayo Sal au de Grind verbraennt, ich han nacher usgseh wie en Boxer nacheme Fight.
Mittlerwile gahts wider. Ich han etz nomal en Moskitospray kauft und no e Moskitocreme und pflastere mich etz jede Tag zue, z erst mit Sunecreme und daenn mit Spray und ganz ehrlich, ich glaub ich gwoehn mich dra.

Ah was au no laessig isch da, mir goend raecht vill z Nacht no is Meer go schwuemme, also irgendoepper laht sich immer finde wo mitchunt und das isch amel so schoen, will d Sternehimmel sind echt unglaublich da une und ich han scho jenes Sternschnuppe gseh.

D Gaegend da isch raecht sicher, es isch scho noed so e riichi Gaegend, aber all da kaened "Campo Danesas", und d Guides da, darum muend mir noed so Angst ha.
S Camp isch bis vor churzem no inere aermere Gaegend vo Venezuela gsi und dett seg s Camp im ganze 4 mal usgraubt worde und zwar mit Waffe und alles. Darum haends daenn beschlosse nach Chichiriviche z zieh.
Letschti bini zrugg is Camp gloffe und daenn sind 2 Poliziste ufeme Toeff cho und haend mich komisch aglueget und daenn bitz spoeter sinds vonere andere Richtig cho und haend wider so glueget und daenn haends vorem Tor vom Camp ghalte und ich bin ine und han nuet degliiche tah, will sie au nuet degliiche tah haend usser mich aglotze und daenn hani de Guides grueft und die sind mitne go rede und nacher hani gfroeget was sie heged wele. Ah sie heged nur wele d Fraue da chli aluege. Hallo????

Daenn haets da en lustig Gmueshaendler, de Maria. Also es isch so, er heisst anschiinend Maria, aber er seit au ois allne Maria. Das heisst du gasch ane "Hola Maria" und er seit "Hola Maria!" und strahlt ueber all sibe Bagge, de isch echt en Coole, aber er isch au befruendet mit oisere Natalia und be ihm wuessemer au das er ois noed ueber s Ohr haut.

Daenn was de Strassebau betrifft, da han ich de Arbeiter chli unraecht tah, wo ich gseit han, das sie fast noed vorwaerts schaffed, es gseht glaub nur so us, will sitt ich da bin, sind die Strasse raecht schnaell gwachse, sicher noed Schwiizer Standard aber immerhin.

Bald sind Wahle da in Venezuela, Favorite sind Hugo Chavez und Manuel Rosales. De Chavez bruucht 10 Millione Waehler, damit er d Wahle gwuehnt und darum isch siin Wahlkampagne zwei Haend wo i d Luft gstreckt waerded, 10 Finger, 10 Millione Waehler.
Mer gseht die Haend ueberall.

Oisi Spanischlehrerin, d Pamela, die laebt sit 1984 in Venezuela und sie verzellt ois vill ueber d Politik da und sie isch au mega engagiert mit Projekt in Afrika und China (ihre Maa isch vo dett) Sie haett au mal in Senegal und Pakistan glaebt und sie haett verzellt z Senegal chasch der i jedem Lade en Pass mache lah.

Jaja sowiit mal wider vo mir, ich wuensche oi allne es schoens Weekend!