Chichiriviche

Hola!

Ich saeg oi, de PC bruucht Nerve.... Bis ich da mal oeppis zum laufe bringe und d Foeteli wo ich gester i muehsamer Arbet ueglade han, sind irgendwie au wieder verschwunde, darn....
Naja, etz schriibi defuer mal chli, was ich bereits so erlaebt han.
Also startemer bem Flug mit Lufthansa, de isch super gange, z Frankfurt am Flughafe hani bereits die 2 andere Schwiizer kaeneglernt und mit dene ischs daenn wiiter gange nach Caracas. Ufem Flug nach Caracas haends Alkohol usgschaenkt und einige haend wacker trunke, so isch raecht schnaell e gselligi Stimig ufcho im Flugi und mini bede Sitznachbere haends raecht lustig gha mitenand, obwohl sie sich vorher no nie gseh haend. Irgendwaenn haends daenn au mit mir afange schwaetze, bis daenn de einti waegpennt und nueme verwachet isch bis zur Akunft in Caracas. De ander und ich haend en daenn wele amale und sustigi Spaessli mache mitem, aber jedesmal haett er de Chopf dreht und umegrunzet. Daenn hani bem Waeg ufs WC au staendig wider Luet kaeneglernt, so paar Type vonere Ska Band, wo in Europa uf Tour gsi sind und mir gad d Nummere i d Hand druckt haend, ich soeli mich doch maelde. Ufjedefall ischs raecht en churzwilige Flug gsi, mit 2 doofe Film, Devil wears Prada und Just my luck (Lindsay Lohan sucks)

In Caracas acho haemmer de Rest vo de Gruppe atroffe und ich bin fast under miim Rucksack zaemebroche *g* Ja daenn haett ois de Guide empfange, mir haend daenn gmerkt das no eine fehlt, nomal en Schwiizer und so haemmer daenn no einigi Ziit uf de muese warte, (fuer eimal noed uf mich ;o) bis es daenn aentli los gange isch.
Oises Gepaeck isch uf Jeeps glade worde und mir sind verteilt worde, i die 3 verschidene Jeep, sind raecht zamedruckt ghocket,mit em Rugge a d Wand. Churz nach Abfahrt simmer scho in Stau cho, debi haemmer suscht scho 4h Fahrt vor ois gha und mir sind doch all todmued gsi. Aber easy hani halt miin Chopf chli a d Autotuer gleit und versuecht z doese, bis bummmmm! de hinder Jeep i oise inegfahre isch. Nacheme Ziitli haemmer aghalte zum luege eb was kaputt isch, es haett ok usgseh, aber nachemer wiitere Wiili haets komisch afah toene, also haemmer wider aghalte und festgstellt, das es doch kritischer isch und so sind en Teil vo de Gruppe i di andere 2 Jeeps verfrachted worde und es paar und ich haend uf de Abschleppwage gwarted und sind mit dem und oisem kaputte Jeep i d Garage. Dett isch de Jeep provisorisch gflickt worde. Mir sind so mued gsi, das mir vor de Garage ufem Bode ipennt sind. Irgendwaenn isch daenn so en lustige Typ cho, de Kim, und haett ois mitgnoh, richtig Camp und underwaegs haend mir doch tatsaechlich de Rest vo de Gruppe igholt will de Rucksack vonere Schwedin waehrend de Fahrt vom Jeep abegheit isch und auf nimmer wieder sehen verschwunde. Sie isch zuraecht am Bode zerstoert gsi.
Ufjedefall ischs daenn im provisorisch gflickte Jeep wiiter gange, bis mer wider haend muese ahalte, wills ebe doch noed so guet gflickt gsi isch (irgendwas mit de Achse ischs Problem gsi)
Tja also simmer wider verteilt worde uf anderi Jeeps, de Kim haett nomal muese cho, de kaputti Jeep zrugg i d Garage und mir daenn irgendwaenn doch no im Camp acho. Dett haets daenn no frischi Fruecht geh und daenn simmer all dankbar i oisi Haengematte gsunke. Bin im ganze fast 30 Stund wach gsi, abgseh vo dene paar Naps wo ich zwueschedine no gmacht han.

Am nexte Tag haemmer daenn mal de ganzi Staff kaeneglernt, daenische Campleiter und daenischi Guides wo all usgsehnd als waehreds gad useme Surferfilm usegumped und no die bede Chuchijungs, das sind 2 Iheimischi. Usserdem d Natalia oisi Spanischlehrerin, sie isch Argentinierin. Dezue gstosse isch spoeter daenn no d Pamela, e australischi Rentnerin wo mit ihrem Maa scho siit Jahre in Venezuela laebt und noed usem schwaerme ueber das Land usecho isch.

Also mir gfallts au sehr guet da mueni saege, s Camp isch laessig gmacht, alles offe nur obe deckt, mir haend e Sau, 2 Schildchrote und en Rottweiler, de Brutus.
Vill Privatsphaere haemmer noed, aber es haett sich scho e zimli gueti Gruppedynamik entwicklet. D Luet sind all mega zwaeg, ich gnuesses mega, es isch wie Lagerlaebe. Mir sind etz die erste 2 Wuche wie gseit im Camp, nacher ziemer daenn los is Land zum chli Abetuer erlaebe, Anacondas ufstoebere und so (kein Witz)
Vorher haemmer am Strand es Beachvolleyturnier gmacht, de Strand isch gad i de Noechi vom Camp. D Ortschaft saelber also Chichiriviche haett 11 000 Iwohner, d Strasse sind bis uf d Hauptstrasse noed teered, aber sie sind dra, da sie waend en Art Tourisezentrum mache. Aber so wie die da schaffed bruucht das no ewig. Vom schaffe her naemeds scho raecht gmuetlich und waenn immer mir durelaufed, luegeds und ruefeds und d Arbet gad vergaesse. D Fraue gigeled meistens, waens ois gsehnd, also e bitz wissi Huut langed tatsaechlich zum d Venezolaner usem Huesli z bringe. Aber sie sind immer all mega astaendig (ok, die spanische Kommentaer verstahni nonig) und haend uh Froid waenn, Hola, que tal? ruefsch und amel ruefeds Hi, how are you?

Vo de Sicherheit her muemer scho bitz ufpasse,also mir haend paar wuesti Gschichte ghoert, z.B. das es scho mal vorcho chan, das eim d Knarre an Chopf ghebt wird, aber daenn muen mer eifach s Zueg hergeh und daenn haueds schnaell wider ab.
Ich hoffe etz mal, ich muen das nie erlaebe, aber mer muen uf alles gfasst sie.

Daenn das mit de Moskitostich isch au sone Sach. Gsehnd faengs all us, als wahreds a Masere erchrankt, ich wird amel halbe wahnsinnig wills so biist, aber mer doerf ja noed chratze, wills suscht entzuende choenti.
Sie haend ois vonere Schwiizerin verzellt, wo vor ois im Camp gsi seg, die heg dermasse fest kratzet, das s Bei agschwule seg und daenn heg si zum Doktor muese und de hegi gseit, mer muesi ihre s Bei abneh. Aber schiinbar haends das daenn au anders choene richte, ufjedefall passi etz aber besser uf, nach dem Horrorgschichtli.
De Antibrumm nuetzt imfall ueberhaupt nuet, de isch glaub uf Schwiizermueggli tested worde, noed uf bluetruenstigi Suedamerikanischi, die sind warschinli richtig geil uf europaeischs Bluet.

Hm, what else, also was d Foeteli betrifft, also wie gseit, es bruucht raecht vill Ziit und Nerve, aber es haett funktioniert, nur sinds etz irgendwie verschwunde.Ich han drum beschlosse nuem so vill Pics upzloade, au will ich mini Kamera noed z vill umeschleppe wott, genau usem Grund, das sie choent gstohle werde. Muen ebe jedesmal waenni is Internet Cafi gahn, oeppe 15 Minute durs Dorf laufe und wie gseit, ich fall noed gern uf und das tuesch mitere Taesche um so meh.
Hm aber goend doch uf www.buhi.eu, das isch d Page vo eim vo de bede Schwiizer wo mit mir im Camp isch, be ihm gahts 10 Sekunde zum Foetli uelade und s gseht erst no besser us vom Format und so. Er muen au nur de USB Stick mitneh, wann mer is Internetkafi goend.
Ufjedefall gsehnd ihr uf sinere Siite, be Photos, Venezuela, Chichiriviche, Foeteli vo oisem Camplaebe und so, vilicht entdecked ihr mich au noimet.

Jaja, mini Ziit isch etz daenn scho wider abglaufe, aber ich han glaub eh scho wider so einiges gschriibe. Ich wuensche oi allne e schoeni Ziit und versueche mich bald wider z maelde. Liebi Gruess!

PS: Han etz usegfunde,wo d Foetli hisind: wela-venezuela@blogspot.com
Froeged mi noed wie wiso, langi Gschicht, alles noed so eifach wie ich gmeint han, aber allgemein, bliibts be welavenezuela, also ohni Bindestrich.
Und suscht ebe buhi.eu, wobi ich gad gseh han, das de Typ ja grausami Schriibfaehler macht, aber egal *g*