Cayo Sombrero

Ok, han gad PC Absturz gha und min ganze Text, wo ich eigeli ja als Draft gspeichert han, isch verschwunde....

Also d Party isch laessig gsi, ich han schlussaendlich doch no was zum verchleide gfunde und daenn haemmer die ganz Nacht duregfaested unds am nexte Tag raecht tranquillo gnoh, da die einte under massivem hang over glitte haend.

Gester simmer daenn uf e Insle namens Cayo Sombrero. De Strand isch echt paradisiesch gsi und es haett es schoens Riff gha mit villne Fisch, wo mer daenn haend choene schnorchle. Fuer die einte ischs erste mal gsi und die haend daenn richtig Instructions bruucht, wie mer Schnorchel und Taucherbruele bruucht und ich bin mir daenn scho fast bitz wienes spoiled brat vorcho, will's fuer mich so saelbstverstaendlich isch, da ich scho zig mal gsi bin.
Es haett ufjedefall allne mega gfahle.
Zwueschedine haemmer Beach Volley gspillt oder eifach chli doeset am Schatte.

Huet Morge haemmer entdeckt das mega villne Luet Sache waegcho sind, ueber d Nacht und wo oisi Guides s Camp abgsuecht haend, haends aenet de Muur ganz vill Chleider gfunde, wo oepper drueber gruehrt haett und usserdem no d Flosse vo eim.
Ich han daenn i dem ganze Huufe au no es paar Shorts vo mir entdeckt.
Die wertvollere Sache, wie MP3 Player, Ghetto Blaster vom Camp, Sunebruele und no paar anderi Sache, wie Sandale und suschtigi Schueh sind aber def. verschwunde. Vo mir isch zum Glueck nuet waegcho, will ich all mini Sache im Hammock House gha han, das Zueg wo waeg cho isch, isch dusse umeglaege.(Ok, vo mir sind au no Sache umeglaege, aber ich han i dem Fall eifach Glueck gha) Trotzdem, es hett noed soele sii. Komisch isch au, das de Brutus kei Ton ageh haett und au suscht niemert verwachet isch, will normalerwiis staht ab und zue mal oepper wider uf, inkl. mir, sicher 2mal pro Nacht verwachi und stahn uf, aber letscht Nacht hani tuef duregschlafe.
De Rene, oise Guide, haett e Vermuetig, wer's hett choene sii und gaht etz huet mal go abchecke und au zur Polizei, obwohl er etz scho wuessi, dass das warschinli noed vill bringe werdi.
Vo etz a weli de Rene au dusse uebernachte und im Dezember gits en 2te Rottweiler.
Usserdem haemmer e Trillerpfiife uebercho, das mer choend Ton ageh, waemmer z Nacht oepper gsehnd umeschliiche.
Es haett au Azeiche geh, mal sind paar Type a oisem Tor go ruettle cho und irgendwaenn haemmer mal es paar ghoert umeruefe das es "da ine" Gringos hegi.


Ja morn isch daenn oise letschti Tag im Camp, uebermorn gahts am Morge frueh (so um die 4i) nach Los Llanos (12 Stunde Fahrt, eine vo de chuerzischte, vo allne Trips) wo mir daenn i de Wildnis usse schlafe waerded, fuer 5 Taeg, ebefalls i Haengematte.
Dett goemmer daenn ebe nach Anacondas go sueche, mir muend daenn glaubs durs chnuetuefe Wasser wate und mit Stoeck umestochere, vilicht macht das aber au nur de Rene, oise Guide, aka Crocodile Dundee, de kaent etz gar nuet, fast beaengstigend. Mir werded au en Kaiman fange und go riite goemmer au mal, das seged voll die wilde Ross und es seged scho paar abegfloge, ich han ja mini Erfahrige gmacht mit Ross, aber trotzdem, es gseht so us, als chaemted mir da wuerkli s volle Programm ueber.

Ehm ja, daenn a d Mosiktos hani mich wuerkli langsam gwoehnt, de Koerper reagiert glaub irgendwaenn eifach nuem so heftig. Das isch ois au immer gseit worde, mir muesed oise Koerper dra gwoehne lah, s bisse und so seg alles im Chopf, mir muesed das lerne usschalte. Schliesslich, was segi Suedamerika ohni Moskitos?
Wos raecht haend, haends raecht.
Trotzdem, in Los Llanos chaems daenn glaub no haerter, dett seged d Moskitos so groess wie Flugzueg *g* und es chruechi und fluechi eifach ueberall.

Ich maelde mich nach em Trip wider, falls mich kei Anaconda abewuergt, aber ganz ehrlich, es isch noed emal gseit, das mir eini findet, will die raecht schuech seged. Hoffetli sinds au schuech, waenn ich mit mine rot-wiss puenktlete Gringobei durs Wasser stackse.

So long!