Hola

So etz hani Ziit zum no schriibe was ich vergaesse han und was suscht no so passiert isch. Also gester Abig hani de Usgang dihei noed so vermisst, will's be ois im Camp au raecht abgange isch. Es isch e iheimische Band cho go Musig mache, mit so Trumle und es isch so Stimig ufcho das am Schluss eifach all am tanze gsi sind, sogar de groessti Tanzmuffel hett sich dere Stimig noed choene entzieh.
Daenn haemmer au no so Spili gmacht, wobii ich mich dett zrugghalte han, nachdem ich scho mal schlaechti Erfahrige gmacht han, mit so Zueg.
Es isch aber raecht lustig gsi und mir haend alles i allem e super Nacht gha.

Ja und huet haets en Brunch geh und nacher Spanischunterricht und aschluessend haend es paar und ich s "Hammockhouse" muese usewuesche, also de Ruum i dem mir schlafed. Wie gseit, mir schlafed all i Haengematte - hammocks und ich han mi scho guet dra gwoehnt. Ufem Foeteli wo ich als Comment gschriibe han "Oisi Gaegend" dett gseht mer s Schlafhuus, une ine schlaft de gross Teil vo de Gruppe und obe haets nomal 4 Haengematte, dett haett mer daenn no chli meh Outdoor Feeling.

Daenn wie atoent haemmer all oisi Aemtli z erledige, aber das isch amel schnaell gmacht. Huet Abig tuet ei Gruppe saelber choche und morn d Gruppe wo ich dri bin, mir mached Faijtas.
S Aesse isch immer sehr guet, normalerwiis choched de Angel und de Daniel, das sind 2 Iheimischi. Sie lueged au das fuer d Vegis immer was haett, mir sind z Dritte, no 2 Schwedinne und ich.
Was eifach raecht gruusig isch, d Milch wird us Milchpulver und Wasser zaemegmixt und solangs de Angel und de Daniel gmacht haend, haets mer amel chum gmerkt, aber etz macheds 2 vo oisere Truppe, au es Aemtli, und die verwaesserets immer total, das chame daenn amel nuem aesse, aber ich choents sicher au noed besser.

Ja im Internetkafii isch au immer Stimig, mer choent meine, das all Chind nach de Schuel da ane choemed zum game, teilwiis sogar scho ganz chlini Chnoepf, wo vorem PC am umeballere sind, mit Chopfhoerer und d Kollege stoend naebed dra und waerded amel ganz ufgregt und daenn vergaessed sichs total und schreied im Zueg ume (im Beste Fall mir i d Ohre) und lehned sich amel halbe ueber mich drueber, will noed all hinder am Gamekolleg Platz haend zum luege. Also es bruucht amel bitz Konzentration, zum die Iitraeg schriibe.

Jaja und wie gseit, Chichiriviche isch relativ chli, aber es haett vill Laede, alles halt noed z vergliiche, wie's be ois usgseht, aber mer chunt so zimli alles ueber, was mer fuer de taeglich Bedarf brucht. Was schad isch, es liit sehr vill Abfall ume und es haett vill umestreunendi verwarlosti Huend, wo eim amel so truurig alueged, das sie am liebste mitneh wuersch, aber ich glaub die haend keis schlaechts Laebe da. Huet hani zwei gseh, wo sich begruesst haend und daenn zaeme an Strand sind und sichs under eme Suneschirm gmuetlich gmacht haend, haett no lustig usgseh, fast maenschlich.

Daenn vo de Luet her, wie gseit, die meiste sind Daene, darum wird im Camp vill daenisch gredt,daenn ebe die 4 Schwedinne, die eint gseht us als waer sie gad useme Astrid Lindgren Buech usegumped mit ihrne strohblonde Haar und de Pfuusbagge.
Ja und daenn no 2 Schotte und mir 4 Schwiizer. Es isch aber noed so das ich nur mit de Schwiizer bin, aber es isch halt scho chli so, waemmer die gliich Sprach redt, verstaht mer sich ebe no ufere andere Ebeni, das gsehni au be de andere.
2 Schwedinne sind scho als Kollegine cho, 2 Daene als Paerli und die bede Schotte sind au scho als Kollege cho. Die meiste vo de Luet blibed nur so 2,3 Monet und nur wenigi 6, so wie ich.
Ich froi mich etz scho uf Voluntary work, han aber au Zueg ghoert, wo mir die Froid chli nimmt.
Zum Bispill seg eini uf Los Roques Island gange, zum mit Schildchrote schaffe, aber nach 3 Wuche scho wider zrugg cho, will sie so verfolgt worde seg vo de Iiheimische Mane, das sies nuem usghalte heg. Aber ebe, das sind alles so Horrorgschichtli wo mer mal ghoert, wie das mitem Ueberfall, wo 2 Maedels underwaegs gsi sind i die Stadt wos daenn voluntary work hetted soele mache und daenn isch de Bus ueberfale worde, vo bewaffnete Type, oder das mit de andere, dere wo's Bei haend wele abneh. Das sind Sache wo choend vorcho, aber noed zwingend muend und ich hoffe ich etz eifach mal wider Glueck. Han's ja au gschafft s Sackmaesser im Handgepaeck mit nach Venezuela z naeh *g*
Ufjedefall han ich no kei Ahnig wo ich ane chume, saeb Infomeeting wird erst oeppe i 2 Wuche stattfinde.

Daenn zum Spanisch lerne, ich bin etz i d Afaenger Gruppe, will vill vo de Luet da scho mal 3 Jahr Spanisch gha haend i de Schuel (Daenemark) oder eini isch vo Ecuador her cho und chan's darum au scho raecht guet. Leider gits keis Mittelding, will einigi i minere Gruppe haend am Afang no keis Wort choene und ein Typ de schaffts eifach noed, die Woerter uszspraeche, er tuet sich mega schwer demit.
D Spanischlehrerin isch chli e usgflippti, ebe die Pamela, sie isch total ufgstellt und laessig druff, aber vilicht waechsli daenn gliich i die ander Gruppe, will das wo mir bis etz mached isch noed ganz das wo ich erwarted han.

Ja und zum Meer, das isch herrlich da, s Wasser isch oeppe 28 Grad, also seichwarm, die letzte 2 Taeg haets zwar gstuermt und graegnet und daenn haett s Wasser au bitz abkuehlt. Letscht Nacht simmer en Nachtschwumm go mache und haend enand dur d Luft gruehrt im Wasser, was daenn amel raecht eis uf de Sunebrand gfitzt haett, aber ich bin zum Glueck nur ganz schuech verbrannt, hingaege anderi sind brandrot.
Die Sune da isch halt eifach vill staercher als mir ois gwoehnt sind, da chasch die no so ischmiere. Mir sind au groessteteils am Schatte gsi, aber bem Beachvolley simmer daenn halt de Sune usgsetzt gsi.

Sowiit vo mir....

Mached's guet!