Orinoco Delta y Merida

Ueee und bin au scho wider zrugg vom Jungle, die Ziit fluegt nur so dahii und bald hani au scho d Helfti vo miim Ufenthalt hinder mir.
Entgaege miim letschte Itrag bini noed im Delta bliibe, es haett mer scho gfale, aber ich choent glaub noed en ganze Monet dett blibe, dezue daenn spoeter no.

Ufjedefall wie ich scho gschribe han haet ois de letschti Trip is Orinoco Delta gfuehrt. Mir haend au wider e laengeri Reis gha und underwaegs ime Chavez Camp i de Noechi vo El Tigre uebernachted. Eigetli haemmer z erst i freier Natur wele schlafe, haend daen aber saeb Camp gfunde und agfroeget. Mir haend daenn dett oisi Haengematte doerfe ufhaenke und ueber Nacht bliibe.
Fuer de Trip haend mir all muese spezielli Expedition Haengematte poste, wie ich scho gschribe han und ich han also ziemli guet gschlafe i dene obwohl anderi gfunde haend, sie vermissed ihri Haengematte dihei im Camp.
Ja waeg saebem Chavez Camp, also das isch eigetli meh e Farm gsi wo vom Chavez gsponseret worde isch und natuerli isch alles zuepflastered gsi mit Chavez Wahlplakat und so. De Typ haett ja wider d Wahle gwune und es sind also lang noed all zfride mit dem Ergaebnis. Ich bin ufjedefall mal froh sind d Wahle ume und haend sich d Luet wider chli beruhigt, defuer sinds etz halt im Wiehnachtsruusch.

Ja ufjedefall ischs daenn am 2te Tag nach Mittag los gange mit em Boot de Fluss ufwaerts zu oisere erste Unterkunft eme chliine Warao Indio Doerfli. D Warao Indios laebed all ine Art Holzhuetene am Fluss. Die Huetene stoend uf Pfaehl und haend kei Waend. Die einzig Irichtig sind d Haengemattene zum schlafe und no paar Utensilie zum Aesse zuebereite. Die einzelne Huette sind verbunde mit Staeg. Ueberall hanged Woeschleine mit farbige Chleider. D Warao Indios waerded vom Chavez understuetzt, er laht Aessratione verteile und sogar Fernseh und Stereoalage, total crazy, waenn paar chlini Indiokids am Bode vo ihrere Huete gsesch vorem Fernseh hocke und "Mister Incredible" luege. Es isch aber ufjedefall raecht idruecklich gsi zum gseh wie die laebed, am beste Foeteli checke uf www.travellog.dk/idamarie oder www.buhi.eu, so chan mer sichs besser vorstele.
Ja wasi eifach schad gfunde han, die Luet schmeissed ihre Abfall eifach ueberall an Bode, das heisst es haett amel wie di reinst Muellkippe usgseh, so vermischt mit em sumpfige Bode. Ich han daenn oise Guide de Rene gfroeget, wiso das so isch und er haett eifach gmeint, das dene s Verstaendnis dezue faehlt, wie mer Abfall sammlet und so. Vill vo dem Abfall landet natuerli schlussaendlich au im Fluss.
D Waraos sind vill mit so Holzkanus underwaegs. Wo daenn es paar vo dene mal oisi Kanus ustested haend, haends es rise Freudefaest gha und sind umepaddlet und immer meh Mane sind cho und haend mal wele probiere. Die haends fast noed choene glaube, das mer mit dene so schnaell vorwaerts chunt.
Ebe mir sind taeglich au mit de Kanu underwaegs gsi, also i zwei Gruppe ufgsplitted, will mir sone grossi Gruppe sind haemmer z wenig Kanus gha und so isch immer en Teil mit em Boot gange und nach e paar Stunde haemmer gwaechslet und mir sind also froh gsi.
Nach so 5 Stund paddle gspuert mer daenn d Aerm scho. Am erste Tag hani raecht Mueh gha aber nacher ischs vill besser gange und ich han's au choene gnuesse, die abetuuerlich Landschaft rundume, mir haend vill Affe gseh, Bruellaffe und Capuccino Affe, Tucane und Aras. Au wider Kaimane und Schlange.
D Naecht haemmer i verschidene Camps verbracht, teilwiis Indiodoerfli oder eifach eleistehendi Huetene irgendwo im nirgendwo, ebefalls uf Pfaehl ueber Wasser. Und ueberall haemmer wunderbar oisi Haengemattene choene ufhaenke. A de einte Oert haetts amel verdaechtig krached im Gebaelk waen mir i oisi Haengematte glaege sind, aber es haett zum Glueck immer ghebet. Defuer amel d Braetter suscht noed so, eimal isch de Jacob ueber en Staeg gloffe und eis Braett haetts gad kehrt und er isch drueberab in Sumpf abgheit. Und ich bin eimal mit eim Bei au ikrachet, bini au raecht verschrocke.
Ja und d WC's sind meistens eifach so Plattforme gsi wo die a irgendeme Ast haesch choene hebe, daenn haesch au amel nur choene hoffe, das nuet laht.

A eim Tag haemmer en Junglewalk gmacht und es haett in Stroeme graegnet, allgemein haets raecht vill graegnet. Ufjedefall simmer daenn amel au regelmaessig im Sumpf stecke blibe, aber es isch sehr interessant gsi, will die iheimische Fuehrer (wo mir a jedem Ort naebscht oisne Guides au haend) haend ois vill verzellt ueber d Boim und Pflanze und was d Indios fuer Medizin druus mached.
Eine vo de Indios isch daenn wie en Aff ufen Baum ueklaettert und wos anderi us oisere Gruppe haend wele probiere, haends kei Chance gha zum Halt finde.

Ja daenn eine vo oisere Gruppe isch vome Piranha in Zeche bisse worde. Er haett Glueck gha, de Zeche isch no dra gsi ;o)
Vo dett a haemmer gwuesst, mir soetted nuem in Fluss go bade, nach dem mir s Gschirr drin gwaesche haend. Normalerwiis soets naemli keis Problem sii, aber waenn d Piranhas Food schmoecked daenn choemeds i Schare.

Ja die zweitletscht Nacht haemmer daenn ziemli luxurioes verbracht, i de Delta Lodge, das isch e Underkunft fuer Touriste, en Art Hotel mit Bar und Resti und eme Puma und Tapir. Mir haend also wider d Glaegeheit gha i richtige Bett z uebernachte. Das waer also au de Ort gsi, wo ich hett choene schaffe, aber de Bsitzer isch mer gar noed sympatisch gsi und ich hett warschinli nur Aenglisch gredt, will all dett au Aenglisch reded und so hani mi daenn daegege entschiede. Zum ei Nacht bliibe ischs aber nett gsi, han u.a. au e Begaegnig mit ere Vogelspinne gha, wo i eim vo de Zimmer uftaucht isch, genau im Zimmer vo dere, wo am meiste Angst vor Spinne haett. Mir haend sie daenn ufjedefall entfernt, han sie daenn au mal ufem Arm gha und im Nu isch sie mir uf de Rugge und id Haar krabblet, hani gad chli Herzchlopfe uebercho.

Ja die letscht Nacht simmer nomal ines Indiodoerfli, dett haetts die lustigste Chind gha, si sind i Schare cho und haend mit ois wele spile, so herzig gsi.
Am Abig sind daenn ganz vill Chaefer cho und ois uf d Haengematte ghocket, e paar vo oisne Maedels haend voll hysterisch tah und das heg d Nachtrueh empfindlich gstoert. Ich bin zum Glueck im ruhige Huetli aene gsi, defuer haend staendig d Huend afah baele waenn ich ufgstande bin, naja.
Natuerli haets au wider tuusig Mugge gha immer und ueberall, aber das hani ja scho mehrmals erwaehnt und mini sibehundert Muggestich schockieret glaub au keine meh *g*
Ufjedefall isch saeb Indiocamp raecht im Schlamm gsi und mir haend choene froh sii, das es daenn noed graegnet haett.
Haend daenn au wider mal es Gschichtli z ghoere uebercho, im Indiodorf gaegenueber haett ein Typ eme andere d Frau usgspannt, daenn isch de saeb usgflippt und haett de ander mitere Flaesche tod gschlage (Alkoholsucht isch raechts Problem dett) und em d Auge usegschnitte. Er chunt fuer das ein Tag i d Chischte und wird vo de Polizei abgschlage, nacher isch er wider frei.
Herrsched anderi Gsetz da. D Polizei isch echt korrupt. Wo mir uf em Heiweg noimet Halt gmacht haend zum z Mittag aesse haett eine en Rucksack us oisem einte Auto gstohle (s Faenster isch offe gsi) und isch devo graent. En andere haets gseh und ois grueft. Daenn isch d Polizei cho haett de Dieb verprueglet und Gaeld wele, damit mir de Rucksack zruggueberchoemed. De Typ wo ois grueft haett, haett au Gaeld wele. Also haett d Bsitzerin vom Rucksack gad dopplet muese zahle, fuer eimal Faenster offe lah.

Jaja etz bini wider zrugg in Chichi im Camp. Huet Abig haemmer Abschidsparty, will uebermorn en Teil vo de Gruppe heigaht.
Und ich hoffetli nach Merida. Isch naemli planed, das ich ueber Wiehnacht Neujahr zaeme mit 2 Schwedine und 1 Daenin im Zoo in Merida schaffe. Haend es Zimmer uebercho, z mitzt i d Stadt.
Eine vo de bede Schotte wird inere Bar go schaffe und au mit ois fiire.

De Rest blibt im Camp, mir haend da naemli etz es Projekt am laufe und zwar tuend mir de Chindsgi in Chichi renoviere. Oise Campleiter haett das gstarted zum zeige, das mir au oeppis waend bitraege und es guets Bispill sii, das mer au oeppis chan mache, ohni Gaeld defuer uebercho. Es traut ois naemmli schiints no niemert wuerkli da und es wird immer wider gfroeget was mir defuer waend.
Mir haend etz Plakat gmacht zum d Luet ufzfordere, das verbi choemed go luege.
Mir sind de Chindsgi etz scho mal go aluege, wiener etz usgseht. Und es isch wuerkli schlimm, d Spilgraet sind all kaputt und rostig und eher e Gfahr fuer d Chind als oeppis anders. Daen au dett ueberall Abfall und d WCs haend kei Tuuere und kei Spueli, will oepper d Wasserpumpi gstohle haett.


Sooo mittlerwiile haemmer scho de 21igst und ich bin bereits in Merida, bin letscht mal nuem zum wiiterschribe cho.
D Abschiedsparty isch eher ruhig gsi, irgendwie sind all entweder z mued oder z truurig gsi. Mittlerwiile haend mir au Wiehnachtsbeluechtig und Christbaum uebercho im Camp und d Fruendin und de Sohn vom Glenn, oisem Camp Leiter, sind us Daenemark itroffe.

Am Tag nach de Party bin ich frueh mitem Bus nach Tucacas mitere Kollegin vom Camp, Heidi, go e Tieraerztin bsueche be dere ich im Februar und sie im Januar schaffe choenti. D Tieraerztin isch sehr sympatisch und au ihri Assistaentine und ich glaub d Arbet saelber waer extrem interessant, aber ich han mich nonig def. entschiede.

Am Abig haemmer daenn im Camp Filmabig gha, Casino Royale, Raubkopie, aber gueti Qualitaet und ich bin also begeistered vom neue Bond.

En Tag spoeter, 17te, sind daenn 5 vo oisere Gruppe abgreist richtig Heimat isch raecht en truurige Abschied worde.

Am nexte Tag simmer daenn zunere Geburi Party beme Gay Guy iglade gsi, zum Salsa tanze und bade. Ich bin gad oeppe 5 Minute bliibe, wills jenes Balloen im Pool gha haett wo staendig i de Sune platzt sind. Defuer hani daenn choene packe fuer Merida.

Ja und sitt knapp 3 Taeg bini etz in Merida, zaeme mit de Clara und de Linnea
2 Schwedinne. Mir sind mit em Nachtbus ueber Valencia gfahre und vorgester Morge frueh acho. Sie haend da uebrigens teilwiis raecht komfortabli Nachtbues, wo mer chan d Lehne hinderelah wie im Flugi und es haett Stuetzene fuer d Bei, usserdem loends Film laufe, zwar immer grotteschlaechti, letscht mal ¨Death calm 3¨ mitem Charles Bronson, isch fast scho lustig gsi, will er so theatralisch gspillt gsi isch.
Ja und d Nachbues sind au immer extrem abekuehlt, mues mer sich fast wie i de Skiferie ipacke oder aber de Schlafsack mitneh, was ich etz immer gmacht han.

Ja und allgemein zum Vercher da egal ob Bus oder Auto, immer halsbraecherisch schnaell underwaegs und Verchersregle kaeneds offesichtlich noed, die einzig Regle wo existiert isch ´De schnaeller isch de gschwinder¨ da wird amel draenglet und ghupet wie verruckt. Au s Uffahre isch extrem, die chlaebed enand immer gaegesitig a de Stossstange, das schellt mich amel fast.
Daenn haends au immer luuti Salsa Musig i de Buess, isch amel ganz underhaltsam, aber amel au so luut das der d Ohre zuestoepsle wettisch. Und was d Fahrplaen betrifft, gitt eigetli keine, de Bus fahrt erst waenn er einigermasse guet bsetzt isch. Chasch die also noed wuerkli uf Ziite verlah. Daenn choemed amel Verchoifer i d Bues und priised luutstarch a, was azbuete haend. Meistens sind das Getraenk oder Chips oder Glace. Amel verteileds irgendwelchi Sache und choemed nacher go s Gaeld isammle und falls es noed wotsch gisch es eifach wider zrugg.

Ja etz aber zrugg zu Merida, also mir sind daenn am 19te am Morge frueh in Merida acho und mit em Taxi is Zentrum und zu Guamanchi Tours, die organisieret Adventure Trips und vermieted au Zimmer. D Frau vom Bsitzer isch vo Neuchatel, usserdem schaffed no en Daen dett und sehr vill Rastafari Guides.
Ufjedefall teiled mir ois etz dett es chliises Zimmer und i 2 Taeg chunt d May Britt dezue, die haett no wele bem Chindergarte Projaekt debi sii, wird daenn aber au mit
ois im Zoo schaffe.

Ja und nach Wiehnachte chunt de ganzi restlich Trupp nah wo im Camp bliibe isch, ebefalls zu Guamanchi, fuers 100 Prozent Adventure Programm und die werded daenn so Usflueg mache i d Berge, zum go Mountain Bike, Chlaettere und so.
Toent laessig, aber bringt miim Spanisch noed vill, darum han ich mich fuers schaffe entschiede.

Zu Merida, also es isch echt genial da, s Klima isch vill chueler als in Chichiriviche, durchschnittlich 19 Grad, aber es gfallt mer vill besser so, han die Hitz echt chum meh usghalte und es haett au vill weniger Moskitos ume.
Usserdem liit Merida gad be de Ande zue und mir haend eh wunderschoeni Ussicht uf d Berge. Daenn ischs au raecht touristisch, dur das sind sich d Luet a Wissi gwoehnt und mer wird nuem so agstarrt. Das isch au so oeppis, wo ich chum meh usghalte han, am schlimmschte sind glaub die junge Fraue gsi, wo staendig ueber ois gredt haend und uf ois zeiget und glachet, als waehred mir en wahnsinnig lustige Ablick. Aber ich chan's au guet verstah, ich mein die meiste junge Fraue da leged sehr vill Wert uf ihres Uessere, sind immer sehr ufreizend agleit, haend vill Make up und haend perfaekt frisierti Haar und daenn choemed da so paar verhangeni, bleichi, verstocheni Gringas usem Jungle z stolpere wo sitt uebere Wuche nuem dusched haend, draeckigi Chleider und Schweissfilm im Gsicht und d Mane huped und pfiifed und ruefed I love you, waehrend ihri Fraue naebed dra hocked, ja isch doch irgendwie verstaendlich. Ich weiss etz glaub bitz wie sich en Promi fuehlt, und nei danke, ich wott nie im Laebe tuusche.

Jaja Merida isch echt agnehm, es isch au vill suuberer da und europaeischer, haett Paerk und vill Studente, sprich jungi Luet und guets Aesse und fruendlichs Personal, in Chichiriviche bisch der immer sehr unerwuenscht vorcho,
und ueberhaupt, am liebste wueri gad da bliibe bis im Maerz.
Ev. chani im Januar fuer Guamanchi Tours schaffe, das mueni etz no abklaere.

Ja daenn zum Zoo also mir sind daenn nach Akunft so ziemlich straight zum Zoo gange zum ois go vorstele. De Zoodiraekter isch mega nett, gseht chli us we de Chavez; und haett sich alli Ziit gnoh zum ois umefuehre und d Tier z zeige, es isch eher en chliine Zoo aber sehr schoen mit vill Boim und schoene Waegli und Baenkli und Wasserfall. Usserdem schmoeckts amel nach frischgschnittenem Gras, ich han gar noed gwuesst wie fest ich de Gruch vermisst han.
Ja wasi eifach saege muen, also d Gheg vo de Tier sind teilwiis vill z chli, aber schiinbar weleds groesseri Raubtiergheg boue, haett aber noed so toent als wuer das i noecher Zuekunft passiere.


Ja und zu de Tier also es haett vill verschideni Affesorte u.a. Capuccino Affe und Paviane. Daenn en wiibliche und en maennliche Loi, en Puma, wiibliche und maennliche Jaguar, verschideni Arte vo Voegel, wie Tucane, Papageie, Pauxi Pauxi, Geiher, Pauji etc., es Dromedar, chlini Wildchatze, Tapire au es Tapirbaby. Es Affebaby haets au.
Daenn Schildchrote, chlini Wildchatze, en Bruelebaer mit em Name Coco, vill verschideni Arte vo Schlange etc. Kaene no lang noed alli Tier da, aber mir haend scho einiges ueber sie erfahre. Gaeg Aendi vo de Fuehrig haett er ois daenn no paar Instructions geh und ois gfroeget eb mir Morgeschicht oder Abigschicht schaffe waend und waenn mir frei waend.
Mir haend etz also amel Weekends frei und schaffe tuend mir Morgeschicht, das heisst vo 8i bis 2 am Namittag. Gester haend mir daenn oise ersti richtig
Arbetstag gha.
Mir sind gaeg di achti mit em Bus zum Zoo uegfahre, liit chli i de Hoechi, und dett haett ois daenn de Elvis, Assistent vom Tierarzt, gad mit uf d Morgefuehrig mitgnoh, zum allne Tier guete Morge saege, mir haend daenn gad choene es paar Schildchrote mit uf de Waeg neh, Morrocoy Land Schildchrote, zum is Gheg zruggbringe. Nacher haemmer en Spaziergang mit em Papagei gmacht, de Elvis haett all Tier checked und dur d Gitterstaeb d Raubtier kraulet. Mir haend daenn au mal doerfe be de Loiin chraebele, die isch glaub am iidruecklichste vo allne, mer ghoert sie staendig quer dur de Zoo bruelle. Nacher simmer ´hinder d Kulisse´ is Buero vom Tierarzt, de isch aber noed ume gsi. D Klara isch daenn go haelfe de Food fuer d Tier zuebereite und d Linnea und ich sind go d Voegel fuettere. Nacher simmer chli im Buero vom Tierarzt umeghocket, waehrend de Elvis oeppis am Computer umetoeggelet haett. Nacher isch er verschwunde und haett ois agwiise chli Tierfoeteli am PC aluege und Musig lose. Spoeter isch er mit ere Boa Constrictor zruggcho wo mir haend muese huete. Ich han sie mir daenn um de Hals tah fuer es Foti, bin sie aber zum Glueck schnaell wider losworde, wo sie mich afah haett wuerge.
Ja was suscht no, e Chue isch no gschlachted worde und raecht lang tod umeglaege, d Igweid naebed dra und jedesmal waemmer wieder backstage gange sind, isch sie chli meh usenand gnoh gsi, bis es am Schluss eifach nur no gstunke haett. Mir sind daenn zrugg is Buero, au dett ine haets bestialisch gstunke und i dem Momaent entdecked mir es Gonfiglass mit ere tote Schlange und eme tote Affebaby drin. Han also raecht en starche Mage bruucht. Nacher isch daenn no de Waerter vom Schlangehuus is Buero cho, mitere chliine Schlange und die isch daenn irgendwie abghaue und daenn haemmer die no muese sueche, aber sie isch nueme uftaucht.
Am 2 haemmer daenn Fiirabig gha.

Huet ischs aehnlich locker gsi, mir sind wider mit em Elvis uf de Morgespaziergang, daenn haemmer doerfe s Dromedar strigle und be de Schlangefuetterig debi sii, das isch raecht iidruecklich gsi, aber natuerli haend mir d Mues au leid tah. Teilwiis haend d Schlange mega lang eifach nur gluuret und d Muus haett zitteret im Egge, will sie genau gwuesst haett, was sie erwarted. Daenn d Klapperschlange haett d Muus eimal attackiert und sie so vergiftet, damit sie sich nuem chan bewege. Daenn isch d Schlange ganz noech mit em Chopf zum Muuschopf und haett ere is Gsicht inezuenglet und sie nacher langsam afange schlucke, waehrend d Muus no gschnuufet haett.
E anderi Schlange haett d Muus eifach so lang a d Terrariumwand druckt bis sie verstickt isch, haett raecht krass usgseh, so mit usgstreckte Pfote und ufgrissne Auge und de Zunge dusse.
Jaja grausami Tierwaelt, aber sehr faszinierend. Haend amel scho chli Mueh, mir
3 Vegies.

Spoeter simmer daenn eine vo de Cappuccino Affe go ifange, wo am Ellboge verletzt gsi isch, zum en verarzte. Eine vo de Waerter haett en festghebet und de Elvis haett de Aff verarzted, de haett spitzi Schrei fahre lah, als wuer er be laebigem Liib broetlet.
Ja und nacher simmer es Cola go trinke mit em Elvis und em Zoodiraekter und d Linnea isch ploetzli zaemeklapped, das isch die wo scho bem Wandere zaemebroche isch, daenn haemmer sie zunere Aerztin mit pinkem Pulli und pinke Lippe bracht, haett ener wie e Coiffeus usgseh. Sie haett daenn jenes Frage gstellt und fast druff beharrt, das d Linnea schwanger seg und wo sie daenn erfahre haett, das sie Vegie isch, isch das daenn natuerli d Loesig gsi, daenn haemmer ihre erchlaert, das mir andere au Vegies sind und waeg dem noed zaemeklapped und daenn haett sie gfroeget wie alt das mir sind und wo die andere zwei gseit haend 19ni haett sie hoehnisch glachet und gfunde, vill z jung. Jaja mir haend lustigi Begaegnige da, aber d Luet im Zoo sind echt all mega sympatisch und kuemmeret sich uh guet um ois.
Und ebe, d Arbet chan mer eigetli noed Arbet naene, eher Freibillet in Zoo plus zuesaetzlich chli hinder d Kulisse luege. Echt laessig. Morn sind d Linnea und ich daenn bem Tierarzt, haend en huet scho kaeneglernt und d Klara, wo 7 Jahr Spanisch i de Schuel gha haett, wird gschuelet, damit sie bald cha Touriste umefuehre.
Jaja haend echt es Schoggilaebe im Momaent. Aber glaub all im Zoo haends raecht locker, es schaffed zum Bispill au raecht vill huebschi Maedels da im Zoo wo eifach chli dekorativ umestoend und waenn d Bsuecher e Frag haend gaebeds Uskunft.
Die einti haemmer nach em Underschiid zwuesched 2ne Papageie gfroeget. Ihri Antwort isch gsi, de einti isch rot, de ander gruen, haha.

Jaja mir gahts echt guet wider, han z Chichi bitz e Krise gha, aber etz gahts wider ufwaerts, vilicht hani eifach au mal e Pause bruucht, will es isch scho schwirig gsi, 2 Monet ohni jeglichi Privatsphaere und immer ume riise Gruppe ume und ich bin lang noed die einizig wo Mueh gha haett.
Etz bem ¨schaffe¨ hani au s Gfuehl gahts besser vorwaerts mitem Spanisch will was ich vorher im Camp glernt han isch ehrlich gseit en raechte Witz gsi, hani schlussaendlich muese feststelle.

So etz hani nuet meh z brichte, aber wie gseit, froi mich immer ueber Gaegebricht!

Ganz liebi Gruess und vill Spass bi de Wiehnachtsvorbereitige!

PS, Wiehnachte wird fuer mich das Jahr raecht langwiilig im Zimmer gfiiret.
D Venezolaner zelebriered d Wiehnacht naemmli mit riise Fuerwerkspektakel und Neujahr wird daenn no schlimmer. Han darum gad chli e herti Ziit, vor allem wills scho sitt eme Ziitli agfange haend mit umechloepfe jederziit und ueberall. Maengisch wachi am Morge am 5i uf, will irgenden schlaflose Kerli irgendwelchi Kracher im 5 Minute Takt abfueret, da froeg ich mich ernsthaft eb die echt nuet bessers z tue haend um die Ziit. Naja da mueni etz dure.
So long!