Jelly Bean von Camwood 1994-2006

Am letzte Mittwuch 27. Dezember isch oisi Jelly Bean im Alter vo 12i ame epileptische Afall gstorbe. Es isch fuer mich schwer z begriife, das sie nuem da wird sie, waenn ich hei chume und es tuet weh das ich noed richtig han choene Abschied neh, aber vilicht isch es besser, bin ich etz da und chan mich ablaenke.
Schlussaendlich haett sie es schoens Laebe gha, vergliche mit gwuesse Huend da, wo halb verhungeret dur d Strasse strielet, mit Ekzem und Wunde ueberall und statt Zuewaendig choemeds en Tschutt ueber.
In Merida isch es etz au wider anders, da choend sich die meiste Luet raechts Fuetter und de Tierarzt leiste. Es haett aber au da heimatlosi Huend, eine isch momentan ja ebe im Zoo igsperrt und wo ich am letschte Fritig mitem go spaziere bin, isch er mir abghaue, will d er kei raechti Leine haett. Ich han daenn ghofft, das ich ihm so zumindest s Laebe gretted han, will er igschlaefert wird, waenns keis Diheime fuer en finded, aber leider isch er uebers Weekend scho wider im Zoo uftaucht und um d Zoowaerter umegschwaenzlet und so natuerli wider igsperrt worde. Gester isch er scho wider abghaue, aber us siim Chefig und ich hoffe dasmal isch er gschiid gnueg und bliibt em Zoo fern. Daenn en andere heimatlose Hund isch vome Auto agfahre worde und haett etz ganz en komplizierte Beckebruch. Mir haend en huet bem Tierarzt groenget. En wiitere Hund isch ebefalls vome Auto agfahre worde und haett fast de gliich Beckebruch. Ja ich han also bis etz no gnueg Huend um mich ume, aber mini Jelly wird mir immer faehle, es wird so leer sie ohni sii dihei.

Bis ich hei chume gahts ja no es Ziitli, ich wir etz bis am 5te Januar no im Zoo schaffe, am 6te reised daenn May-Britt, Linnea und Klara ab und ich blibe bi Guamanchi, das isch die Posada wo ich wohne. Hauptsaechlich ischs aber es Adventure Toure Buero und ich chan etz es Ziitli fuer die schaffe. Im Februar hoffi daenn, dasi chan ime Chindsgi go schaffe, vilicht lerni dett besser Spanisch als be de Crazy Pamela (oisi Spanischlehrerin im Camp gsi) Es haend sie all unbruchbar gfunde und darum werded etz au paar reklamiere be de Organisation.
Ja und ich chan etz im Zoo no chli profitiere, dur s vile zuelose, verstah tueni naemmli scho so einiges, nur s rede isch so schwirig.
Ah uebrigens bin letschti be de Operation vome Capuccino Aff debi gsi, de haett e Verletztig am Chnue gha und die isch so fest agschwule, das mers haett muese useschnide. Ich han daenn leider muese feststelle, das ich zwar sehr interessiert bin, aber bem Ablick vome Maesser inere Wunde schwachi Chnue ueberchume. Han daenn muese absitze und leider noed choene am Tierarzt assistiere, defuer mit bleichem Gsicht zueglueget und em Aeff s Haendli ghebet, de isch total plemplem dett glaege, miteme total verdroegete Blick, vo all dene Spruetze wo er uebercho haett.

Ja daenn zu miim Silvaester, also hani ueberlaebt, bin sogar mit de Gruppe go z Nacht aesse, aber nacher schnaell zrugg i d Posada graennt, wills eifach zu fest taetscht haett dusse.
I de Posada hani mi daenn ufen Abig im Zimmer igrichted, aber daenn isch en Teil vo de Gruppe cho und haett wele uf de Dachterrasse fiire, will d Clubs erst nach Mitternacht ufgmacht haend. Tja daenn haends mi au uezwunge, aber zum Glueck akzeptiert, das ich ohni mini Chopfhoerer vom Dach abegumpe. Dasmal bini aber noed so tapfer gsi, wie a Wiehnachte und zimli schnaell wider is Zimmer verschwunde, vor allem ischs Dach scho zimli bsetzt gsi, vonere laermige Gruppe vo ca. 15 Hollaender.
Jahreswaechsel hani daenn verschlafe, han echt kei Lust gha uf fiire, erst raecht noed, nachdem ich das waeg miim Hund erfahre han.
Usserdem hetti eh Zuestaend uebercho, waenni hett muese dusse sii, mit all dem Fuerwerk und in Merida haends zuesaetzlich no e spezielli Tradition a Silvester. Sie bastled ueberall laebensgrossi Puppe und stopfed die mit Fuerwerk. D Chind tuend fuer de Zwaeck mit Kaesseli Gaeld sammle.
Die Puppe symbolisiered s alte Jahr und alli schlaechte Sache und am 12 waehreds daenn i d Luft gjagt und somit au alles schlaechte vom alte Jahr.

Nach de 12i sind daenn es paar vo de Gruppe is Cucaracha gange, das isch en Nachtclub in Merida mit mehrere Floors, Techno und Latinmusig und zwar so luut, das anschiinend regelmaessig d Alarmalage vo de parkierte Autos vorem Club abgoend.
D Nacht isch glaub fuer die einte raecht uus g'arted. Eine isch sturzbetrunke be mir im Bett ipennt, so das ich d Nacht uf de Bettkante verbracht han und kei Minute gschlafe han, will ich han muese ufpasse, dasi noed usem Bett usegheie. Er haett sich au noed bewege lah und waenn immer ich ihn versuecht han z wecke, haett er mich mit em Taxifahrer verwaechslet, wieso au immer.
En Anderi isch ueber Nacht miteme Typ us Caracas verschwunde. Zwei vo oisere Gruppe haend mitenand umeknutscht und sich am nexte Tag chum meh choene i d Auge luege. Oise einti Guide haett es Techtelmechtel mit einere agfange, wo inere Gruppe vor ois gsi isch und mit ihrere Kollegin ueber Neujahr es Bsuechli in Merida gmacht haett. Eini vo de Schwedinne isch mit eme Hollaender verschwunde. Striitereie hegs au geh, will mer sich noed haett choene einige wo fiire und mit wem und so wiiter, han ufjedefall en huufe interessanti Gschichtli z ghoere uebercho am nexte Morge.

Ja ja, ich hoffe ihr haend schoeni Faesttaeg gha und mir vilicht chli positivers z brichte?

Hebed Sorg,

Besos, Manuela