Venezuela: December 2006

Que pasa

Hey also zur Info, das mit de Fotene uelade klapped aentli einigermasse und ich han etz vill zum nahole. Darum choemeds halt amel chli durenand und unregelmaessig, aber ich muen immer luege waenni Ziit han und wie lang d Batterie vo miim Fotiapparat hebed.

Ja daenn zu Wiehnachte, also ich han's erstuunlich guet ueberstande, z erst simmer ines Resti go z Nacht aesse und daenn zrugg i oisi Posada und dett uf d Dachterasse mit vill Schoggi und Guetzli und Chueche und Wii und Chips und allem Wiehnachte fiire. Mir haend zum Stimig mache einzig Samichlaus Chappene und Cherzene gha, aber Merida isch zimli beluechted gsi mit Wiehnachtsdeko. Daenn haemmer au Gschaenkliustuuschete gmacht und jede haett es Wiehnachtslied us siim Land gsunge. Ich han leider nur s schlimmste im Chopf gha "O Tannenbaum" aber die andere haends glaub raecht amuesant gfunde. Ja daen haend sich no 3 US Amerikaner zu ois gsellt, vo Austin Texas, Philadelphia und New York, unterrichted all English a de Uni in Caracas. Sind daenn gad chli politischi Diskussione ufcho, aber mir haends underhaltsam gha und ich han de Fuerwerk Terror dank Chopfhoerer, The Bronx und viiill Wii ueberstande, sorry aber das isch noetig gsi, will es isch echt crazy gsi, luut und haett nuem wele hoere und ich wuer saege es isch en raechte Fortschritt, das ich ufem Dach bliibe bin. Mal luege wie Neujahr wird.

Ja daenn im Zoo machts natuerli immer no Spass, mittlerwiile simmer au vill no mitem Tierarzt underwaegs gsi, de redet perfaekts amerikanisch, aber ich bin fast bitz froh, will daenn chani ihn so richtig loechere mit Frage und er isch echt en underhaltsame, ziemlich sarkastisch. Ja es isch also immer no easy life im Zoo, was haemmer no so gmacht, eimal hani mit em Tierarzt e Klapperschlange undersuecht, er haett sie am Chopf festghebet und daenn isch sie haessig worde und haett afange rassle und ich han choene d Rassle alange, vibriert richtig aber isch zum Glueck noed gfoehrlich, nur de Chopf.
Daenn huet haemmer d Schildchrote zaemegsammlet und einzeln undersuecht, sind ca. 45 Stuck, haett also no Ziit bruucht, vor allem haett mers amel chum gseh, will sichs under Stei etc. versteckt haend. Eimal haend d Klara und ich i d Praxis vom Tierarzt mitchoene, daenn haett er en Hund und e Chatz behandlet und mir haend choene zueluege. Ja und huet haend d Klara und ich mit uf d Fuehrig muese, damit mir bald ready sind zum saelber Touriste umefuehre. Mir haend fast nuet verstande, will sie so schnaell gredt haett. Aber mir haend etz so Infobletter uebercho und tuend etz die studiere. Zum Glueck muestemer daenn nur English spraechendi Bsuecher umefuehre.
Ja und en Hund haetts da au, de seg eifach in Zoo inespaziert und heg Voegel und Reh agriffe und darum haends en etz igsperrt. Etz luegeds fuer es Plaetzli fuer ihn, suscht muends en abtueh. Mir goend etz amel mitem go spaziere und froeged ume, eb oepper de Hund kaennt oder eine wetti.

Ja daenn mittlerwiile isch de Rest vo de Gruppe acho, die haend ja Wiehnachte im Camp gfiiret, daenn haends d Sau vom Camp gschlachted und zu Wiehnachte gspachtlet.
Und etz sind da fuers Adventure Programm, mached no
cooli Sache. Am erste Tag sinds go Canyoning mache und huet vonere 40 Meter Brugg gumped, ame Seil.

Sowiit vo mir!

Besos, Manuela (Seg gemaess Tierarzt en sehr altmodische Name in Spanie, er isch ganz verbluefft gsi, das ich so heisse, ha ha)