Los Llanos

Ueh!!!!

Bin zrugg vom Los Llanos Trip und mir haend echt super Ziit gha, so guet, das ich beschlosse han, det fuer en Monet go schaffe gah. Dett, das heisst "Rancho Los Angeles", e Farm in Los Llanos, total im Nirgendwo, 1.5 Stund vo de nexte chlinere Ortschaft. Uf dere Farm wohnt de Lejandro mit sinere Familie und mir haend die letzte 5 Taeg det uebernachted, au wider inere Huette mit Haengematte.
Uf de Farm haetts ganz vill Tier: Huend, Chatze, Gueggel und Huener, Saue, Ross, Chueh, Papagei und suschtigi Voegel wo ich noed so ganz han choene definiere, ussert das sie ganz komischi Gruesch mached die ganz Ziit. (Amel sehr zu Laste vo oisem Schlaf)
Mir haend mega vill erlaebt, also am erste Tag simmer gad als ersts los uf Anaconda Jagd. Mir haend langi Stoeck uebercho und haend daenn muese im Wasser umewate und umestochere und prompt haett daenn eine vo de iheimische Guides eini verwuetscht und usem Wasser zoge. Mir haend sie daenn eifach am Chopf festghebet, also gad direkt hinder em Chiefer, damit sie noed zuebisse chan. Ich Dummerchen han daenn allne e halbi Herzattacke verursacht, will ich mal vor em Schlangechopf duregloffe bin und sie haett daenn zuegschnappt und mir ganz knapp am Gsicht verbi. Ich glaub, ich bin am wenigste verschrocke, will ichs gar noed richtig gmerkt han, aber all andere haend gad nach Luft gschnappet. Ich han daenn de Schlangechopf au mal ghebet, han daenkt, ja das chan ich scho, wird scho nuet passiere, aber wo s daenn so wiit gsi isch, hani fast i d Hose gmacht.
Sie isch daenn au immer haessiger worde und haett sich gwunde und darum haend mir si daenn bald wider frei lah.
Am nexte Tag simmer daenn go Piranha fische, dett han sogar ich als Vegie mitgmacht, han's eifach noed choene blibe lah. Han daenn au 2 gfange, en chliine und no en grosse, aber de isch mer daenn wider devo gumped, wo ich en an Land zoge han.
Die Piranhas haend scho extrem scharfi Zaeh und waends packsch, muesch ufpasse, das si dich noed bissed. Ufjedefall haemmer am Schluss vom Tag gnueg zaeme gha, fuer all und haends am Abig broetlet.
A eim Tag simmer go Kaiman jage, dett sind nur d Guides is Wasser und mir haend daenn en Chliine und nacher no en Grosse gfange. Dene haemmer muese s Muul zaemebinde, damits noed zuebissed.
Mir haend daenn au no vill interessants erfahre ueber all die Tier und wie mer sich verhalte muen, i gwuesse Situatione etc.
Ja a eim Tag simmer no ufen Bootstrip, wo mer daenn no Delphin gseh haend, das sind e spezielli Art vo Delfin wo i Fluess laebed und sie gsehnd glaub au zimli speziell us, mir haend nur d Flosse gseh im Wasser. Mir hetted eigetli soele mit ihne schwueme, aber sie sind daenn irgendwaenn abghaue und mir sind daenn trotzdem is Wasser, obwohls vo Piranhas gwimmlet haett, es haett daenn eifach gheisse, solang niemert blueted, griifets noed a und waenn eine agriift, griifed all a und watsch, sind oisi Guides im Wasser gsi, daenn sind die meiste nahgumped, will mer so verschwitzt sind, hett echt nie daenkt, dasi mal so crazy Sache mache wird.
Ufjedefall isch alles guet cho, niemer isch verletzt worde, was au guet isch, will au da hett villes choene schief gah. Beme Anaconda Biss zum Bispill, muemer sofort d Wunde useschniide, will sie suscht afangt fuule.
Daenn haemmer au netti Gschichtli ueber Pumas ghoert, wo scho agriffe und so.
Mir haend aber trotzdem alles usprobiert, sind au mal inen Kaiman Teich go bade, mir haend eifach noed doerfe ufem Bode abstah. Eimal simmer no mit de Jeeps zume Huegel gfahre, wo ueber s ganze Flachland gseh haesch und underwaegs haemmer au wider ganz vill interessanti Tier gseh. Mir haend dett une die meist Ziit choene ufem Dach vo de Autos sitze, oder ois s 2te hine ad Autotuer haenke, so haett mer vill meh mituebercho vo de Landschaft. Ah und eimal wo ich vom Auto abgstiige bin, isch mer e Klapperschlange gad knapp a de Bei verbi und haett no halbe s Bei vom Nick gstreift, das haett daenn au e chlini Herzattacke geh.

Ufjedefall haets mir total guet gfahle uf dere Farm, ich wir also fuer en Monet dett ane gah, warschinli im Januar. Die Familie dett laebt vo de Touriste, wo mit Tourguides vo Merida her choemed, zum Anaconda und Kaimane fange, Piranha fische, riite und so, also alles was mir halt au so gmacht haend. Ich wir daenn uf dere Farm mit de Familie laebe und mit de Touriste mit gah uf ebe die Toure, wo de Lejandro und sini Soehn leitet.
Ich wir daenn au lerne mit em Lasso go Chaelbli fange und mit de Ross go Chueh triibe etc. Sind no voll d Cowboys dett. Han mer us dem Grund au en Cowboy Huet kauft, muen doch ready sii, he he.
Natuerli mueni au i de Chuchi haelfe, butze etc. Aber ich froi mich, es isch so wildlife dett, voll im Nuet usse, guet das macht mer widerum bitz Sorge will falls oeppis passiert, isch de nexti Arzt wiit wiit waeg. Aber trotzdem, so lern ich au wuerlkli Spanisch, hoffi, will daenn muesi rede. Die reded dett une zwar en raecht starche Slang und sogar d Venezolaner us andere Regione haend Mueh zum die Luet verstah.
Es haend sich etz au no 2 anderi us minere Gruppe entschiede zum ihre voluntary work month in Los Llanos mache, das heisst mir sind z Dritte, d Mirja (Schwedin) de Morten (Daen) und ich. Vilicht au guet, daenn bini noed so einsam.

Ja was haemmer no so gmacht dett, also a eim Abig sind es paar Musiker cho und haend Musig gmacht und de Lejandro haett risigi Chuehsteak braetlet fuer all und daenn sind no mega vill Luet vo de Farme rundum cho und mir haend tanzed bis spaat i d Nacht. Es isch echt unglaublich wie di Luet tanzed da, mir Maedels sind staendig wider uf d Tanzflaechi zoge worde und daenn haends ois umegwirblet und haend umegsteppt, das chum meh gwuesst haesch wo der de Chopf staht. Ein 18jaehrige haets bsundrigs im Fass gha, mir isch nacher voll schwindlig gsi. Und ein Chline schwitzige (de Condor) haets gha (d Venezolaner sind allgemein eher chlii), de haet sich immer so a eim anedruckt, ui da bisch daenn froh gsi, waen s Lied ume gsi isch, aber oh je, eis Lied isch amel 15 Minute gange, daenn hani nur no es erstickts "Caliente" usebracht und mich us sinere Umarmig gwunde.
Ja aber mir haend au mit de Jungs und de Guides us de Gruppe tanzt und das isch mega lustig gsi, will daenn haesch eifach irgendwie improvisiert, also mir haend echt e gueti Ziit gha. Es haett au sone heissbegehrti Haengematte i de Boim gha und um die haend sich immer all gstriite, mir haend sie daenn mal s 2te eroberet und daenn isch de einti Hund cho und haett sich zu ois i d Haengematte gleit (ich saeg oi, ich han no nie sonen ahaengliche Hund gseh) ufjedefall isch er daenn mitem Chopf uf miim Buuch igschlafe, bis daenn 2 vo dene tanzwuetige Cowboys mit ihrne bede Ross d Party im gstreckte Galopp verlah haend, daenn isch er ufgschosse und baellend hinderher.
Ah ja, mir haend au no en spezielle Bsuecher gha a de Party, es isch naemli ploetzli en Ameisebaer uftaucht und haett afange Bierdose ustrinke mit sinere lange Zunge, da haemmer noed schlaecht gstuned. Ameisebaere gsehnd mega schlaecht, er haett drum glaub gar noed raecht kapiert, was um ihn ume vorgaht.
S Lustigste am ganze Abig isch aber glaub gsi, wo ich mich oeppe e halb Stund miteme Italiener underhalte han, wo kei Aenglisch chan und ich chan doch kei Italienisch und miis Spanisch laht au no z wuensche ueberig, aber mir haend ois irgendwie mit Haend und Fuess underhalte und ois fast nuem erholt vor Lache.

Ah ja go riite simmer au no, also die Ross sind noed so schlimm gsi, wie ois all verzellt haend, aber schnaell sinds gsi, also uf das froi mi daenn au, en Monet lang mit dene Ross go Chueh triibe, epa!

Ja ich han au raecht vill Foeteli gmacht, aber ich han etz gad vorher wider probiert uezlade und etz gaht momentan gad wider gar nuet meh. Probier suscht daenn mal mitem Marc siim USB Stick.

Aber das warschinli erst, waenni zrugg bin vo Gran Sabana, morn gahts naemli scho wider los, de next Trip staht bevor, 2ehalb Taeg Hii und Zruggreis, je Waeg. Im ganze bini 15 Tag waeg vo Chichiriviche, darum wirds etz warschinli es Ziitli lang kein Bloggitrag meh gaeh vo mir, aber ich bin sicher, ich han nacher wider vill z verzelle.

Ufjedefall wuensch ich oi allne e gueti Ziit, ich han ghoert, es seg etz zimli chalt i de Schwiiz (Schwede, Schneesturm , Daenemark, Pflotschschnee), be ois isch es immer gliich heiss, aber ich wir i de Gran Sabana au no zum fruehre cho, haets gheisse. Ufjedefall haett au da de Wiehnachtstrubel scho bitzli agfange, es haett Wiehnachtsdeko i de Laede und "Feliz Navidad" Cookies und so Zueg, hoechst komisch fuer mich, will eifach gar nuet suscht uf Wiehnachte hidueted. Ich fuehl mich au gar noed nach fiire das Jahr, aber mir haend im Camp daenn au es Wiehnachtsfaest.
De Dezember wird sowiso bitz crazy glaubs, will d Venezolaner mached grosse Wirbel um Wiehnachte und praktisch niemert wott schaffe im Dezember, will de ganzi Dez dure gwiehnachted wird. Darum haets au gheisse, werdis schwirig mit voluntary work im Dezember, will es seg daenn eifach mega straeng, will fast niemer go schaffe chunt. Trotzdem hani beschlosse zum das mache. Die ander Option waer es Adventure Programm, wo mer daenn en Monet in Merida stationiert isch und vo dett us alles so Sache undernimmt, wie Mountain Bike Toure und Scuba Diving und Sky Diving und Kajak Toure, Climbing etc. Dett lernt mer eifach nuet Spanisch und darum gahni lieber go schaffe. Fuer Wiehnachte sind daenn sowiso wider all zrugg im Camp. Ufjedefall wotti sicher go schaffe, es gitt so vill interessanti Moeglichkeite, a verschidene Ort in Venezuela und ich chan mich chum entscheide, aber de einti Monet in Los Llanos staht fest.

Also, wie gseit, macheds guet, i'll be back!

Abrazos fuerte, Manuela

PS: Was mer da in Chichi no so gmacht haend, eimal simmer go Chraebs fange i de Lagune (dett haemmer au ganz vill Flamingos gseh) und gester simmer i de Lagune go Fuessball spile, haett paar heiteri Usrutscher geh.

PPS: Waeg de Pudi Pudi Fluege, die heissed eigetli Puri Puri, ich han's nur immer falsch verstande, sorry fuer d Faehlinformation.

PPPS: Han nach Los Llanos, pro Fuess ueber 50 Muggestich gha und de Rest vom Koerper hani daenn nuem moege zehle. Aber es chunt no haerter in Gran Sabana, will die Mugge dett loend sich vo keim Muggespray abhalte und d Puri Puris griifed au in Schare a, ich muen glaub mumifiziert dett ane gah, waenn ich irgendwie ueberlaebe wott, will miis Bluet schiinets bsundrigs gern z ha.

Oh und no was, also d Milch isch mittlerwiile ganz ok, aber s Wasser, das gaht etz so dur en Filter dure, zums desinfiziere und etz trinkemer eifach immer Wasser, wo nach Butzmittel schmoeckt und das isch vill schlimmer als d Milch.