So, mini Ziit be Guamanchi isch ume und ich bin is Huus am Huegel izoge. Es isch echt es schoens alts Huus mit ere Waendeltraeppe in obere Stock, zunere Tuer wo aber abgschlosse isch. S Huus ghoert enere schrullige alte Frau, wo so vill Gsichtsoperatione gha haett, das sie chum meh e Miene verzieh chan.
Es isch echt chalt dett obe und letschti isch no de Schluessel i de Tuer verbroche, etz choemmer d Tuer nuem ganz zuemache, will sie suscht nuem ufgaht. Au suscht ischs ueberall chli offe, das heisst, mir haend sehr vill Viecher im Huus, vor allem jeglichi Art vo Insaekte, Spinne, Mugge und wie gseit, letschti haend sich zwei Skorpione zu de Maria is Bett gsellt, mir waend lieber noed wuesse, wie gfoehrlich die sind, aber de Marc haett gmeint, sie seged toedlich. Was au immer. Daenn haemmer amel au Flaedermues im Huus, was zur Folg haett, das mer etz paar netti Flaedermuusschissflaecke ufem Bode haend. D Putzfrau haett schinbar es Problem mit em Rugge, darum chunt die etz nueme und mir muend saelber butze. Hani keis Problem demit, nur ischs Huus etz scho so draeckig und ich bin erst gad izoge. Daenn ebe, haemmer kei Warmwasser und amel chunts Wasser i eim Puff us de Leitig, so das alles im Gsicht haesch, statt im Brueneli.

Aber suscht ischs nett dett obe. Muen etz halt eifach amel fruehener ufstah, wills mitem Bus oeppe e Stund bis is Zentrum brucht. Huet muesti eigetli au schaffe, aber s Adventoure Toure Buero wo ich schaffe soett, isch gschlosse und kei Seel ume.
Letschti bini verbi gange, go Infos inehole, haett eigetli alles tiptop usgseh und d Luet sind zwaeg und alles, aber ich han ghoere saege, das sii noed so en guete Ruef haend und es haett sich daenn au bestaetiget, wo e Gruppe vo Italiener sich parat gmacht haett, zum de Pico Bolivar bestiige und s ganze so chaotisch zue und her gange isch, das sie sich beklagt haend, zwar in italienisch, aber ich han's doch verstande.
Han daenn mit em einte no en Schwaetz gha und er haett mir au gseit, das er noed so es guets Gfuehl heg be dene. Etz mal luege, huet wo ich be Guamanchi verbi gloffe bin, isch de Bsitzer usecho und haett mich gfroeget, eb ich ev. wetti i eis vo irne River Raftig Camps go schaffe. Ich han no kei Details, aber wart etz mal ab bis morn.
Lueg au mal wie das be de anderne lauft. Toene wuers ebe scho guet, ich chan be dene versueche Toure verchaufe und falls das klapped, chumi 10 Prozaent ueber und chan au mit uf d Tour.

Gester hani en Freitag gha und bin mit de Maria go Paraglide. Ich bin also topmotiviert gsi, han zur Vorsicht no es Stugeron gschluckt und los ischs gange. Min Paraglide Guide isch mer noed so wahnsinnig sympatisch gsi, haett sich aber i de Luft als sehr hilfrich erwiise, wo mer daenn doch zimli schwummrig worde isch. Er isch sofort miteme Chotzbuetel zur Stell gsi und ich han daenn de Rest vom Flug mitere Tuete vorem Gsicht verbracht, waehrend ich wie e Marionette a Schnuer i de Luft ghanget bin. Han sicher en amuesante Ablick abgeh. Han's saelber noed so amuesant gfunde, schliesslich hanis wele gnuesse und d Ussicht isch ja wuerkli atemberaubend gsi und wo daenn d Sune ploetzli fuerrot worde isch und s afange haett idunkle, waer alles sehr idruecklich und schoen gsi, aber ich han's eifach noed choene gnuesse. Defuer hani etz es nois Erlaebnis ufem Buggel, choerble uf 1000 Meter i de Luft.....

De Paraglide Guide vo de Maria isch eine vo de erste Paraglider in Merida und echt en lustige Kerli. Er haett sich gad noi e Digicam zuetah und isch total usgflippt mit Foeteli mache und filme, au i de Luft. So haetts etz zumindest etz paar gueti Foeteli vo mir, wo's mer no guet gange isch.....

Ja was suscht. Letscht Weekend bini wider go bike mit de Maria. Mir sind mit em Jan mit, das isch de Daen wo au bi Guamanchi schaffed. Mir haend e schoeni Tour gmacht, raecht astraengend, z erst alles steil berguf, defuer isch d Abefahrt daenn super gsi. Underwaegs haemmer daenn en Stop bi de Butzfrau vo de Guamanchi Posada gmacht, die haett mich iglade zum sii go bsueche. Sie haett ois daenn es Bier offeriert und mir haend ois daenn au uf eis Bier igstellt. Nachdem mir das trunke haend, haett de Jan nomal nah bstellt. D Maria und ich haend daenn nach em 2te Bier hoeflich abglehnt, aber de Jan haett eifach wiiter trunke, bis er daenn schlussaendlich uf 13 Bier gsi isch. Mir haend daenn au no z aesse uebercho und alles und aentli sind mer daenn zrugg richtig Merida, de Jan isch daenn underwaegs fast ime Auto ineglandet, noed so lustig gsi.

Am Sunntig waeremer daenn eigetli go chlaettere mit es paar Guides vo Guamanchi, aber das isch im letschte Momaent gstriiche worde, us was fuer Gruend au immer und ich bin gad froh gsi, will das glaub eh nur peinlich worde waer, gsehn mich ja voll noed, anere Felswand hange, aber interessant zum usprobiere waers scho.

So long.....

Wela

Los Nevados

Merida News

Ok, ha scho es Ziitli nuem gschribe, isch also wider so einiges passiert.
Zum Bispill isch churz nach Wiehnachte oise Choch vom Camp tot ufgfunde worde, ufghaenkt ame Boimli. Mer weiss etz noed raecht, eb er sich umbracht haett oder ebs Mord gsi isch. Saelbstmord chan sich eifach niemert so raecht vorstele, will es kei Azeiche geh haett, das es ihm schlaecht gange isch. Mer haet nur gwuesst, das er Stress mit de Frau gha haett und etz vermuetet mer en Liebhaber dehinder oder so. D Familie vo ihm haett au noed wele das sini Frau ad Beerdigung chunt. Isch echt truurigi Sach, es haend en all im Camp so gern gha und er haett Chind gha und isch mit nur 31gi gstorbe.
Ja de Teil vo de Gruppe wo nach em 100 Prozent Adventure Programm zrugg is Camp isch, haett daenn gad choene ad Beerdigung gah.
Nach es paar wiitere Taeg im Camp isch daenn wider en Teil vo de Luet hei und die wo laenger bliibed, a ihri Voluntary Work Oert. D Ida und d Charlotte sind nach
St. Theresa, das isch en Ort i de Noechi vo Caracas, wo sie jungi Muettere betroied und dere ihri Chind, waehrend die junge Muettere id Schuel goend. D Mirja, isch nach Los Llanos uf die Farm, wo ich urspruenglich au mal han wele.
Daenn de Marc wo im Dezaember im Jungle Camp gschaffet haett isch nach Merida cho und ebefalls 5 Daenine und 1 Daen. De Morten schaffed ime Heim, mit junge Mane im Teenageralter, wo keis Dihei haend. Er mues chli unterrichte und mitne Sache undernaeh. D Maria schaffed au ime Adventoure Toure Buero, sitz aber meistens eifach chli ufeme Baenkli i de Sune, will sie nuet z tue haett. D Heidi und Louise haend etz sitt dere Wuche aentli ime Chindsgi afah schaffe, d Line isch paar mal mit ere Sozialarbeiterin mit und die ander Heidi schaffed bem Tierarzt i de Klinik wo au d Zootier betroie tuet. Mues glaub au ab und zue bem Hundecoiffeur next door ushaelfe, Pudel waesche und trimme.
Ja und de Marc schaffed be de Universitaetszitig.
Sie wohned all zaeme ime Huus am Stadtrand vo Merida, raecht am Hang. Sehr schoeni Gaegend, sehr schoens Huus, aber chalt und bislang ohni warm Wasser. Letschi haends Flaedermues im Huus gha und d Maria isch mal naebedeme Skorpion verwachet.
Daenn bruuchts au immer ewig mitem Bus vom Stadtzentrum, wills so wahnsinnig vill Vercher haett.
Ich gang ab und zue verbi, choche mitne und schlafe daenn au dett, will d Bues spaat nueme fahred.
Suscht hani aber es Zimmer be Guamanchi Expedition (www.guamanchi.com) und das liit voll im Zentrum. Han's wuerkli guet troffe. Und ebe, ich schaffe au fuer die, also wahnsinnig aspruchsvoll isch mini Arbet dett au noed, muen so Sache mache wie s Equipment nach de Toure checke und zum troechne ufhaenke und nacher wider versorge. Daenn amel go Raechnige zahle uf d Bank oder zu verschidene Bueros i de Stadt.
Go poste fuer d Toure und suschtigi Sache halt, was gad so astaht. Mal hani muese zwei Schluesselbraetter mache, Braett zuesage und schliife, daenn Haegge inemache und so, haett mi gad wider a mini Werkschuel Ziite erinneret. Daenn ab und zue muesi d Notfall Apotheke pruefe und go Medis poste wo faehled etc.
Letschi hani en Spezialuftrag gha, sie haend oepper brucht wo Aenglisch redt und mit ufen 1 Tagesusflug i d Berge gaht. Haends also mich gschickt, will de Fahrer nur Spanisch red und ich han daenn quasi muese uebersetze. Ja han daenn chli es unguets Gfuehl debi gha, aber d Luet sind so herzig gsi, es schwedischs Ehepaar, die haend uh Froid gha a de Tour und es isch ihne gliich gsi, das ich au noed so de Held bin im Spanisch. Sie haend gfunde, ich choen ihne ja eifach en Seich verzele, sie vergaessed das eh wider, es seg doch vill wichtiger das sie eh schoeni Landschaft choend gseh. Sie haend mir und em Fahrer au de z Mittag zahlt und druff bestande das mir s Aessengaeld wo mir vo Guamanchi uebercho haend, doerfed als Trinkgaeld phalte. Choends also noed so unzfriide gsi si, oder?
Ufjedefall hani Schwein gha.
Aber ebe, ich bin immer dra am Spanisch. Ich chum etz eifach so richtig z gspuere ueber, wie fest oisi Spanischlehrerin verseit haett. Ich chan etz zwar Farbe in Spanisch und paar Koerperteil, aber chan chum en Satz mache und han kei Ahnig vo Vergangeheit und Zuekunft. Muen mer etz drum alles saelber erarbeite. Es isch eifach raecht hert fuer mich, will ich doch so gern schwaetze und waenn ich mich daenn noed usdrucke chan und nur bloed umestottere die ganz Ziit, macht mi das halbe anders. Aber mini Kollege da choend au noed besser Spanisch, die reged sich all au uf.

Letschti hani en kolumbianische Aenglischlehrer kaeneglernt und de haett mer e paar Zuekunfts und Vergangeheitsforme biibracht und ich han's mer ufgschribe. Daenn lisi etz au "El Principito"-"Petit Prince" in Spanisch und s National Geographics.
Und natuerli underhalti mi vill mit de Guides und die choend die meiste nur Spanisch.
Daenn im Frontoffice schaffed no abwaechsligswiis en Daen und en Duetsch-Griech,
de Jan und de Volkhart. Bedi sind mit Venezolanerine ghuerate. Em Volkart sini Frau wott besser Duetsch lerne und darum mal mit mir abmache, damit ich ihre Duetsch und sie mir Spanisch bibringe chan. De Bsitzer vo Guamanchi isch au Venezolaner und sini Frau, d Joelle, wo meistens im Office isch, Welschschwiizerin. Sind all mega netti Luet und es wird mer schwerfahle waenni daenn next Monet is Huus zuegle muen. Da bini halt immer wider chli um noi Luet ume,letschti bini zum Bispill mit 2 Brasilianer in Usgang, wo au i de Posada vo Guamanchi uebernachted haend. Daenn haends mi staendig abwaechsligswiis zum Salsa tanze ghoelt und ich han mi weiss noed wie ungschickt agstellt. Sie haend daenn irgendwaenn afange striite, wer de besser Taenzer isch und s richtige Salsa tanzt und ich bin nur dett ghocket und hett am liebste grueft, hallooo, ich bin die wo noed Salsa tanze chan!
Jaja, isch aber en witzige Abig gsi, mir sind is "Hoyo del Queque", naebedra isch gad no s Alfredos, dett gfallt mer d Musig noed so, defuer choschteds Bier umgraechnet nur oeppe 40 Rappe.
Daenn haets no en andere guete Spunte da, dett bini letschi mit de Maria anes Punk Konzert gange. Isch au no lustig gsi.

Jaja, etz isch daenn de Januar au scho wider ume und ich wirde inere Wuche is Huus zieh. Weiss etz aentli au wies wiiter gaht mit mir im Februar. Wir ines anders Adventoure Toure Buero go schaffe. Es isch ganz i de Noechi vo Guamanchi. D Bsitzer sind sones elters venezolanischs Hippie Paerli, sehr sympatisch sowiit. Sie haend mir gseit, sie bruuched Luet wo Aenglisch reded, ich chan also Toure verchaufe, aber au als Guide mit uf Toure, will die ganz Ziit nur im Buero hocke segi doch langwilig. Ganz raecht. Ich hoffe etz, es wird au so laessig wies toent.

Aendi Wuche ziehni daenn also au is Huus und muen daenn halt au die lang Busfahrt in Chauf neh. D Mirja, d Schwedin wird daenn miin Platz be Guamanchi ueberneh und au miis Zimmer.

D Heidi und d Line goend daenn hei nach Daenemark, de Morten nach Los Llanos und die ander Heidi, Louise, Maria, Marc und ich wohned im Huus, plus chunt no d Charlotte dezue, die wird daenn i de Cucaracha Racing Bar schaffe z Nacht.

Letscht Weekend bini zaeme mit de Louise, Heidi, Maria und Line nach Los Nevados,
z erst 5 Stunde mit em Jeep i d Berge, ueber rumpeligi Strasse, teilwiis isch es siitlich steil bergab gange, ohni Leitplanke. Dett acho, haemmer ois daenn i de Guamanchi Posada igrichted und sind s Doerfli go erchunde. Es isch raecht chlii, aber mega herzig. Sie haend dett obe paar Soldate stationiert und die haend raecht grossi Auge gmacht, wo mir cho sind. Sie haend daenn wele Foeteli mit ois mache und mir haend chli mitne gschwaetzt. De Rest vom Namittag hani daenn i de Haengematte uf de Terasse verbracht und am Abig daenn ime Bett, igwicklet i zwei Wuledeckene, wil's so chalt gsi isch. Han aber durs Faenster de schoensti Sternehimmel gseh, ever!
Am nexte Morge simmer daenn mit Ross und Muulesel loszoge, 5 Stund widerum de Berg dueruf, han echt Respaekt fuer die Tier, was die leisted. Es isch teilwiis echt steil gsi und die haend zuesaetzlich no muese oises Gwicht schleike. Ich han es chliises Roessli gha, wo immer haett wele z vorderst sii und darum, chum haett en Muulesel fuere wele, en abdraenglet haett, das isch daenn amel au chli kriminell zue und her gange, waenns ame Steilhang gsi isch, oder waenn irgendwelchi Felsbloeck im Waeg gsi sind, haett daenn eifach miis Bei muese dra glaube, haha.
De Heidi ihres Ross ischs einizige gsi wo de Vortritt uebercho haett.
Isch ufjedefall echt en lohnenswerte Usflug gsi, d Landschaft und alles, marvellous, ich tuen daenn no Pics uelade. Han sitt dett ufjedefall en noie Traumjob, Muulesel Triiberin, haha.
Ah ja apropos, oise Guide isch so en richtige Mountain Cowboy gsi, wo staendig irgendwelchi Usruef ablah haett, so Mix zwuesched Tarzan und Cowboy Juchzer. Sehr underhaltsam gsi, teilwiis haett er daenn au Antwort vome Doerfli irgendwo am Hang uebercho und er haett ois daenn erchlaert, dass das sini Art isch, zum d Kollege gruesse. Ihaaaa.......

Ja unds Wuchenend vorher, bini au einigermasse aktiv gsi, d Maria und ich haend Mountain Bikes gmietet und eigelti wele am Botanische Garte en Bsuech abstatte, aber de isch zue gsi. S Bloede isch, das es amel kei Tafle haett, wo seit, waenn d Oeffnigsziite sind. Simmer halt wider zrugg und underwaegs han ich de allerbesti Falafel uebercho, inere chliine unschiinbare Aessbude.
Isch en gheim Tip gsi, vo eim vo de Guides da.

Am nexte Tag simmer daenn mit de Teleferico uf de Pico Espejo (4765m). Die ersti Station in Merida saelber liit uf 1577m. D Teleferico isch d hoechsti und laengsti (12.5 km) Seilbahn vo de Waelt. Mir haend super Waetter gha und darum geniali Ussicht uf Merida und d Bergchetti rundume. Foeteli folged au no.

Die restliche Maedels haend en Abstaecher nach Caracas gmacht, die haend a Neujahr im Usgang paar Type kaeneglernt und sind die daenn go bsueche. Die haend sich daenn als schwerriichi entpuppt, haend es Penthouse gmietet zum Party mache und in Usgang sinds mitne i irgendsonen VIP Club, wo s alles zahlt uebercho haend.
Sind daenn gluecklich zrugg cho, aber au miteme zimliche Hangover.

Ja die Wuche soetti daenn mal mit uf en Canyoning Trip, bin aber noed ganz gsuund, sprich verchelted und weiss darum noed, wie gschiid das es isch, waenni mich im chalte Wasser vergnuege. Mal luege, waer scho no oeppis, vor allem muesti nuet defuer zahle.

Das waered mal wider paar News vo mir gsi.

Saludos de Merida!

Manuela

Sierra Nevada

Sierra Nevada

Sierra Nevada